SARATOK: Projek Pemansang Mit Menua Pesisir (MRP) chara pemadu manah nangkup peminta renggat baruh enggau jampat.

Sapit Menteri Pengeluar Kuasa enggau Pengeraja Asal, Ali Biju madah, rayat menua pesisir kelebih agi sida ke diau ba rumah panjai begunaka perengkaguna pemun.

Ku iya, tu senutuk enggau tuju MRP nya empu ungkup pemansang menua pesisir nentuka rayat dia enda jauh tinggal ari sida ke diau ba kandang mengeri.

“Kita begunaka sambung jalai ke kebun ti meruan ngambika lantang endur ngereja pengawa enggau bejualka asil utai tanam enggau jelu tupi.

“Pia mega bala kita ti ngemeranka pengawa bumai betaun tentu begunaka sistem parit ti manah ngambika padi ulih tumbuh galak enggau mansutka asil.

“Semua tu begunaka belanja lalu kami naka ulih nyaup bala kita nengah MRP ngambika pengawa ulih dirumban enggau jampat tembu,” ku iya.

Jaku Ali nya disebut pengari iya, Walter Changgai, ba mua mayuh rambau Program Pejalai Nyuaka Chek MRP diatur Palan Servis Komuniti Sitak Parlimen Saratok ngagai bala penerima, ensanus.

Sepenyampau RM30,200 chek MRP udah disua ngagai empat bengkah gempung rambau program pejalai sida Walter sebuat sehari nya.

Bala penerima chek nya iya nya Komiti Pemansang enggau Pengelikun Genturung Pendiau (JKKK) Rumah Philip Abit, Sungai Nyurok Budu nerima RM5,000, JKKK Rumah Bansang Jinang, Sungai Langgir Budu, Saratok (RM12,500), JKKK Rumah Natina Bang, Sungai Bunot Saratok (RM5,000) enggau PIBG Sekula Primari (SK) Lubok Kepayang (RM7,700).

Bantu Tusu Tepung mega bisi disua nyerumba program sehari nya ngagai tujuh penerima ari Rumah Philip enggau Rumah Bansang ke apin nerima bantu nya sebedau tu.