KUCHING: Siku Chairman Komiti Pemansang enggau Pengelikun Genturung Pendiau (JKKK) ba sebuah genturung pendiau di Balai Ringin ditan reman pengelama dua hari begulai enggau anak sereta petunggal iya.

Perintah reman dikeluarka Majistret Zaiton Anuar di Kuching nyentuk Hari Lima.

Lelaki nya ti mega tuai rumah beumur 57 taun ditan Komiti Nagang Penyalah Makai Suap Malaysia (SPRM) begulai enggau anak iya, 27 taun sereta petunggal iya, 57 taun kena malam kemari.

Ketetiga saspek nya didawa salah guna agih belanja Projek Mit Pemansang Menua Pesisir (MRP) dipasuk dalam akaun bank JKKK penyampau RM50,000.

Taja pia, agih belanja MRP nya dikena ungkup diri empu dikena mayar duit panjar meli sebuah lori lima tan.

Semua saspek didawa di baruh Seksyen 23 Akta SPRM 2009 ke alai ulih dijil enda ngelui 20 taun enggau ukum enda kurang ari lima kali lipat rega makai suap tauka RM10,000, nitihka rega pemadu tinggi enti ditemu salah.