SIBU: Perintah Sarawak keran nentuka pengawa nyeleti sekula repuk ba menua tu seruran dipejalai.

Menteri Muda Pelajar, Sains enggau Pansik Teknologi Dr Annuar Rapaee madah, Perintah Sarawak mega deka nampung perambu numbuhka sekula entarabansa.

“Bisi sekeda nanya nama kebuah kitai nirika sekula nya lalu ukai fokus ba pengawa nyeleti sekula repuk ba menua tu?

“Kelalu mayuh peragam ke salah pasal pekara tu. Kami mega deka nampung pengawa nyeleti sekula repuk tu,” ku Dr Annuar.

Dr Annuar mansutka jaku nya lebuh bejadika Palan Komunikasyen Digital ba Balai Mayuh Guna Kampung Bahagia Jaya Teku, ditu tadi.

Dr Annuar ti mega Menteri Muda Kaunsil Kandang Menua enggau Pengawa Berumah madah, Perintah Sarawak enda ulih nganti pengawa nyeleti sekula repuk tembu sebedau nirika sekula entarabansa.

“Pemansang baka tu mesti sama dipejalai ngambika kitai enda tinggal ari menua bukai,” ku iya ti mega Adun Nangka.

Bejaku pasal penumbuh Palan Komunikasyen Digital, iya madahka nya entara inisiatif Perintah Sarawak meransang rebak biak kelebih agi nembiak nguasa pengelandik digital.

Ku iya, inisiatif tu setipak enggau pemansang ekonomi digital ke benung chakah dipejalaika perintah.

“Rebak biak nadai ngira sida diau ba mengeri tauka menua pesisir enda tau enda nguasa pengelandik digital.

Pengelandik tu meri pengelebih sida ngiga penerang enggau nadai betatak ngagai bala nembiak kelimpah ngemansangka runding sida.

“Sida deka tinggal enti enda ulih nguasa penemu digital,” ku iya.