SIBU: Serakup Pengajar Sarawak (STU) Bagi Menua Sibu udah numbuhka sebuah komiti khas nyaga pengelantang kaban iya ti udah pinchin, pia ku Chairman iya, Yong Sie Hing.

Iya madahka pinchin nya ukai mai reti badu kereja tang nandaka ngepun pengidup baru.

“Taun tu, kami bisi 35 iku kaban ti udah pinchin.

“STU Bagi Menua Sibu udah numbuhka komiti khas ungkup nyaga pengelantang kaban ti udah pinchin,” ku Yong.

Yong mansutka jaku nya ba Aum Besai Ninting Taun (AGM) Ke-17 STU Bagi Menua Sibu, apin lama ke udah.
Iya mega madah, bisi 65 iku anak sida ti udah nerima insentif pelajar.

Ari 65 iku penerima nya, 24 iku ungkup peresa Ujian Pencapaian Sekolah Rendah (UPSR), 35 iku ungkup Sijil Pelajaran Malaysia (SPM), lima iku ungkup Sijil Tinggi Persekolahan Malaysia (STPM) enggau siku ungkup GCE.

“STU ngarapka ulih bekerejasama enggau palan pelajar tinggi tauka kolej dudi hari ngambi meri sekularship khas ungkup anak sida ti nyulut ba palan pelajar tinggi tauka kolej,” terang iya.

Yong madah, bisi dua pengawa diatur kena 20 Julai 2019 enggau 31 March 2020 iya nya ngambi kaban baru enggau skim insurans STU.

Sapit Presiden STU Zon Tengah, Adam Prakash mega bisi meri penerang ngagai bala mayuh rambau pengawa nya.