MIRI: Projek pemansang dipejalai ungkup pemaik enggau pengelantang rayat empu.

Sapit Kepala Menteri Datuk Amar Douglas Uggah Embas madah, rayat patut meri kerejasama penuh ba pejalai projek pemansang ba menua sida.

Ku iya, rayat enda patut ngempang jalai tauka taba projek laban pengawa bbaka nya deka ngasuh projek tejanggal enggau lubah tembu.

“Semua projek pemansang dipejalai tu endang ungkup kita, ke pengelantang enggau penyenang.

“Nya kebuah aku ngelalau kita meri kerejasama, anang ngereja pengawa ke tau mai pengerugi ti ukai siku ke rugi, tang semua orang ke diau ngelingi nya.

“Badu agi beempangka jalai, nagang orang ti udah dilempaika pangku pengawa bejalaika projek. Beri mih kerejasama ngagai sida tu ngambi projek lanchar,” ku iya.

Uggah mansutka jaku nya lebuh bejadika Program Betanam Betupi Ngaul Komuniti (AgriCOP) ba sebuah hotel tebilang di Mulu ditu, kemari, ti digulu 200 iku penyereta.