SEBAUH: Perintah Sarawak nengah Opis Betanam Betupi keran mantu pekebun nambahka asil pengawa betanam betupi ti ulih nguntungka sida.

Menteri Utiliti Datuk Dr Stephen Rundi Utom madah, pekara tu setipak enggau juluk Perintah Sarawak nyadi palan tibang pemakai manggai taun 2030.

Nya alai ku iya, bala pebenun mesti diberi penerang pasal teknologi betanam betupi pemadu baru.

“Enggau chara moden, aktiviti betanam betupi enggau pengawa berikan diatu deka muntang agi dikereja,” ku Rundi.

Rundi mansutka jaku nya lebuh bejadika Program Betanam Betupi Ngaul Komuniti (AgriCOP) di Rumah Jimbai Saban, Sungai Gerong, ditu ensanus.

Nambahka nya, Adun Kemena nya nangkan bala pekebun ngemeran pengawa betanam betupi chara moden ngambi mansutka mayuh asil.

Ku iya, pengawa betanam betupi chara moden enggau mansutka mayuh asil deka meri mayuh penguntung ngagai bala pekebun.