KUCHING: Industri dagang kelulut ngembuan penau ti ulih nyadi pun penatai belanja enggau nyungkak tikas sosio-ekonomi raban pedagang.

Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madah, asil dagang industri kelulut udah mujur nyapai belanja penyampau RM60 juta sereta dipelaba deka majak nambah ninting taun.

“Seidang kelulut ulih dipuar lapan kali setaun enggau ngasilka 0.5 kilogram sekali muar enggau rega manggai RM120-RM150 per kilogram.

“Di Sarawak ditu mayuh pedagang ti ngaul diri ngintu sereta ngemansutka produk manyi enggau kelulut ti datai ari pelilih Kuching, Serian, Betong, Sarikei, Sibu, Mukah enggau Miri sereta penyampau pemansut nya ulih datai ngagai 30 ribu seidang,” ku iya.

Uggah madah munyi nya nengah teks jaku iya ke dibacha Menteri Muda Bertanam Betupi, Tanah Adat enggau Pemansang Kandang Menua, Datuk Roland Sagah Wee Inn ti nyadi pengari bejadika ‘Skim Setipikit Chara Manah Betanam Betupi Malaysia Nyaga Manyi enggau Kelulut’ (myGAP. AM) di sebuah hotel tebilang ditu, kemari.

Nangkan nya iya madah dipelaba pemansut produk manyi enggau kelulut udah ngasilka penyampau 90 tan metrik setaun enggau rega dijual manggai RM13 juta.

Nitihka pansik, produk tu mega ngembuan penau ti tinggi laban ulih nyadi produk ba sukut pengerai enggau pemajik ti ngujungka peminta madu kelulut majak nambah.

“Nya alai kelimpah ari madu, produk bukai bisi digaga ari madu kelulut baka sabun enggau kereban kena nuchi mua.

“Madu kelulut mega dikenukuka Institut Pemansik enggau Pemansang Betanam Betupi Malaysia (Mardi) siti pemakai ti ngembuan nutrisyen ke tinggi,” ku iya.

Berebak enggau nya, industri ngintu kelulut tauka dikelala ‘meliponikultur’ tu mega sebagi ari pengawa betanam betupi ti baru ditumbuh di Malaysia ba taun 2004.

Sama datai Sekretari Mendam, Menteri Bertanam Betupi Moden, Tanah Adat enggau Pemansang Kandang Menua, Edwin Abit, Chairman Opis Betanam Betupi Sarawak, Dr Alvin Chai Lian Kuet enggau ke bukai