SARATOK: Rayat bepengerai enggau tubuh regas entara kunchi pemujur ngagai pemansang menua.

Sapit Menteri Pengeluar Kuasa enggau Pengeraja Asal, Ali Biju madah, menua maju ukai semina dipeda ari ekonomi enggau pemansang infrastruktur aja.

Ku iya, pekara pengerai diperati nyadi pekara pemadu beguna laban rayat ti bepengerai ukai semina regas ba batang tubuh aja tang ba runding mega.

“Kitai dekaka rayat ngaul diri ba pengawa ti tau nyaga pengerai tubuh sida baka aktiviti zumba enggau ke bukai.

“Enti rayat gerai, kitai mega lantang ati laban mayuh penanggul ulih diputar, ekonomi deka tumbuh manah enggau ngerembai.

“Kebuah pia, kitai deka nempa menua maju enggau rayat ti ngembuan runding kelas satu, regas gawa enggau mansutka penemu ti menyana,” ku iya.

Jaku Ali nya dibacha pengari iya, Walter Changgai lebuh nyuaka chek Projek Mit Pemansang Menua Pesisir (MRP) ngagai Presiden Indai Tai Fitness Studio Saratok, Florence Annie Joesel, ditu tadi.

Iya madah, inisiatif kelab zumba baka dipejalai Indai Tai Fitness Studio tu patut ditunda bala bukai ti bisi ati enggau rinduka pengawa pengeregas tubuh baka tu.

Berita penuh Ruai 7 pagila.