RAMBAU pejalai nemuai enda lama ke Bintulu dalam minggu siti nyin tadi, aku bisi limpang ngelawa siti ari palan bedaja ti semampai ditapatka mensia mayuh.

Palan bedaja tu diberi nama Tamu Bintulu, umbas pemesai sereta lantang endur bejalai laban penuduk bansal pedaja dia diripih manah sereta berurun.

Tamu tu kebendar besepiak enggau Pasar Besai Bintulu ti nyadi palan makai enggau ngirup tebilang di menua tu.

Kededua pasar tu bisi pengelebih enggau penyelai ari langkar perabung begunan nunda gamal Terendak tauka Tanggi ti ngasuh ati rindu meda. Tambah mega kededua pasar tu didiri semak tebing sungai.

NADAI UTAI KE NADAI

BISI MAGANG… Rengka piring enggau macham utai bukai bisi dijual ditu.

Tamu Bintulu tebilang enggau macham bansa utai dijual, ari lauk babas enggau ikan sungai, buah enggau sayur nyentuk rengka piring pan bisi.

Ari mua penatai, kitai ulih meda rengka piring ke udah tembu diadu tauka dianyam, angkat ngena aja.

Ambika chunto, daun kelait enggau sirih udah ditipan manah, pia mega sarang ketupat dianyam ari bila daun nyiur udah digempung lapan igi segempung

Deruku apong enggau semakau, sungki enggau sulukong, buah pinang, rendai, kapu enggau ai tuak mega udah sedia magang ba siti palan, tau enda ibuh ngelawa endur bukai.

Aku tekait ati meda sekeda asil pengelandik jari chukup alus ke bisi dijual dia baka tangi daun biru, bubu mit digaga nyadika pemandang, timpa enggau bakul bemacham chura ti dianyam ari tali kutak, seluk enggau chapan digaga ari takang mulung.

Tambah mega rega diberi sida enda entu mar baka tanggi nya semina RM10 ngagai RM15 siti, nitihka pemesai enggau penebal daun biru dikena.

Sida ke bedaja ditu datai ari pupu bansa lalu tebal agi ari bansa Iban, Melayu enggau Vaie lalu bansa utai dijual sida mega nadai jauh bida.

Kelimpah ari ai tuak, chiping mega bisi dijual ditu. Nya alai, sida ti deka ngaga tuak kediri empu tau nguji chiping tamu tu, engka bisa agi tuak Gawai Dayak kitai taun baru.

BELACHAN BINTULU

LAKU… Belachan Bintulu chukup tebilang enggau penyamai, enda masin, endang ditemu baru laban nerima mayuh peminta.

Ba ditu, kitai ulih milih kediri ni bagi bansa belachan dikedeka ati, bisi nya ditungkus ngena daun biru, dibalut ngena plastik tauka ditepu dalam kontena nitihka pemerat udah diagih.

Rega belachan ba siti-siti bansal mega enda sebaka, bisi nya dijual lima tuku segala mit-mit dijual ari RM10 nyentuk RM20, setuku besai dijual RM25, RM30 nyentuk RM60 nitihka berat lalu kitai ulih meli setuku mit rega ari RM5 nyentuk RM10.

Kelimpah ari belachan, Bintulu mega tebilang enggau penyamai chenchaluk, rusit, jukut enggau kasam ikan sungai, tang sayau maya tu ukai musin bubuk, enti enda ulih ngasai enggau orang berebut meli bubuk.

Macham bansa produk ari mulung, minyak lalak (nyiur), repu lada enggau macham produk pemakai bukai nyengkaum kuie ulih ditapat ba tetengah tamu.

Bejalai ke ujung agi, kitai deka meda orang bejualka bemacham daun babas baka kantuk mendai, daun sabung, upa enggau bungai kechala, sayuk jagung enggau mayuh ke bukai ti nadai alah tiu ngena jaku.

PEMAKAI RUMAH PANJAI

JARANG DITEMU… Buah senggang entara buah kampung ti masam asai buah maram.

Rindang diri ati lebuh bejalai sebelah kaki lima tamu meda utai dijual orang ke datai ari rumah panjai enggau sida ke bedaja mendam dia sehari nya.

Lebuh mata tepeda buah senggang, enda berasai dilah ulih ngasaika pemasam buah nya, nyau ngasuh gelesi. Pia mega lebuh meda tugung buah maram diengkah berimbai dia, nyilu asai ngeli.

Pia kaki nyingkang, pia mulut enda ngetu ngerara enggau nanya utai ke dijual, jari mega enda pimpat ngambi gambar, nya ti ngasuh ati rindu amat.

Tambah mega sida ke bedaja dia chukup kemerah, tuchum manis belama lebuh ditanya sereta nyaut enggau penuh penyiru, engka sida nemu aku tu orang datai kini, nya alai mayuh utai tanya.

Pemuas ke bejalai, siti pemakai rumah panjai narit ati aku. Salai ikan tasik, gamal ikan nya nyau baka pendiau ikan belukang tang pandak agi langkar tubuh ikan tu.

Ditumpuk dua iku, siku besai lalu siku mit agi, dijual RM10 setumpuk, kira chukup murah ba aku enti dikira pengiruh ngintu, mela enggau nyalai ti begunaka timpuh ke lama.

Kenu ku indai tuai ke nyual salai nya, isi ikan tu jauh nyamai ari salai ikan bukai, nyamai agi ari salai ikan lumek, manis lalu nadai bau lang baka ikan tasik.

Ati bisi deka meli tang enda nyadi laban agi kakang, tambah mega berundingka diri agi jauh pejalai, enggaika salai nyau bekuap ila ketegal bekum kelalu angat dalam kerita.

Lebuh bejalai meling rintai daja muakka kiba, aku bisi tepedaka undang galah, sepit biru umbas pemesai, rega bisi ka pepait peda mata aku. Enda nemu berapa pemerat, tang sejagan nya dijual RM80 ke bisi lima enam iku reranggak.

Enda jauh ari orang ke nyual undang galah nya, bisi ikan tapah tauka ikan labang, sebansa ikan sungai enda betisik. Bisi lima iku agi tubuh nyeruga, sama diperimbai enggau pala ke udah dibelah dua. Isi ikan nya nadai dipeda engka udah dibeli orang.

Aku enda nanyaka rega ikan labang nya laban enggai ngetu lama dia, enda nakal nyium bau lang darah ikan nya, berumban mupuk bejalai ke ujung agi.

Datai ba endur bedaja lumur tiga ujung, meda manuk tuai ke udah dibuai bulu enggau diuru ngena api nyau beteranggak dalam bisin, dijual RM19 siku.

PALAN EKONOMI RAMA

PEMAKAI NYAMAI… Salai ikan tasik entara pemakai nadai belama dibela, tau empa pia aja, rebus gulai daun babas chukup manis.

Mayuh agi pemakai enggau utai bukai dijual ba tamu tu, asai ka dibeli magang, nadai utai dikenggai, nama mansa, jingkau ga, enti betul rega lalu beli.

Belachan, busut perunsut, buah senggang enggau sekeda lauk babas bukai nyadi tepa dibai ari Tamu Bintulu serak tu, mantupka sera nyawa kitai siku-siku.

Sekali meling Tamu Bintulu endang empai puas asai, agi belala. Nya kebuah sehari nya nyau datai tiga kali kami sebuat mansa sida ke bejual, silik utai dipeda.

Ba aku empu, tamu tu sebagi ari daya idup kitai peranak menua pesisir ngulihka belanja ari asil daja, ngulih sesen dua kena bebelika minyak makai, dagin manuk.

Tamu tu bepun ari pemagas tulang enggau pengepuh orang bejualka lauk babas enggau bansa pemakai bukai ti nadai dijual sebelah pasar besai, ditu mih sida ti gawa sebelah mengeri ngiga pemakai.

Ari perati aku, tamu tu palan ekonomi rama peranak menua pesisir, endur nempa kaul penyerakup lebuh pupu bansa ulih begulai ngiga jereki.

CHUKUP BEREGA… Undang galah.

 

PEMILIH… Macham bansa produk pemakai enggau asil pengelandik jari bisi dijual ba Tamu Bintulu.