KUCHING: Opis Pengerai Nengeri Sarawak (JPNS) ngenukuka Sarawak ngerikod siti kluster baru iya nya Kluster Bah Arnab ba Pelilih Kuching.

Kluster Bah Arnab tu ditukuka kemari mungkur empat kes positif Covid-19.

Kluster tu ngaul kes ke-719 ti udah ditukuka positif kena 6 Oktober tu tadi enggau bisi sejarah pulai ari Sabah.

Bisi 16 iku kaul udah diperesa kena 6 September tu tadi enggau 3 iku ari kaul nya ditemu positif Covid-19 kena 8 Oktober (kemari) iya nya kes ke-729, 730 enggau 731.

Naka tu, Kluster Bah Arnab nya agi dipatau lalu semina ngaul diri sebilik aja tang pengawa nyidi kaul bukai benung chakah dipejalai JPNS ngambi enda ngerekai.

Kemari, Sarawak ngerikod lapan kes baru positif Covid-19 ke alai lima kes ba Pelilih Kuching, dua kes ba Pelilih Miri enggau siti kes ba Pelilih Bintulu ngujungka kes positif Covid-19 nambah 732 kes.

Ari lapan kes nya, JPNS madahka empat kes nya kes berampit dalam menua, dua kes import A enggau dua kes import B.

Kes ke-725 nya kaul ngagai kes ke-724 ti ditukuka positif Covid-19 kena 7 Oktober tu tadi lalu ditemu positif ba hari iya beperesa rT-PCR.

Kes mega nadai mantaika kelai kena rampit lalu udah dipasuk ngagai Sepital Bintulu.

JPNS mega madahka kes tu dikategori kes berampit dalam menua iya nya kena rampit ari kes ke-724 entara 27 September nyentuk 7 Oktober tu tadi.

Kaul bukai ngagai kes ke-724 nya ditukuka negatif enggau deka beperesa kedua kali ba hari ke-10.

Nambahka nya, kes ke-726 enggau kes ke-727 nya dua iku lelaki peranak India ti tama ke Sarawak enggau gawa ba sebuah serikat peribit di Miri.

Seduai ditemu positif Covid-19 kena 7 Oktober pengudah beperesa rT-PCR ba sebuah sepital peribit di Miri ba hari ti sama kelimpah dikategori kes import A laban kena rampit ba menua asal enggau pengawa nyidi kaul benung dipejalai.

Kes ke-728 nya siku lelaki peranak menua ti udah bejalai ngagai Kelana Jaya, Selangor kena 22 ngagai 27 September tu tadi laban deka ngabas sida sebilik.

Kes ditemu positif Covid-19 kena 8 Oktober pengudah ngasaika diri renga enggau beperesa Covid-19 kena 6 Oktober tu tadi.

Kes deka dipasuk ngagai Sepital Besai Sarawak (SGH) enggau dikategori kes import B laban kena rampit ba Selangor sereta pengawa nyidi benung dipejalai.

Kelimpah ari nya, kes ke-729, 730 enggau 730 nya kaul ngagai kes ke-719 ti udah ditukuka positif Covid-19 kena 6 Oktober tu tadi lalu sida tiga nya diri sebilik.

Semua kes nadai mantaika kelai enggau udah dipasuk ngagai SGH lalu 13 iku agi kaul ngagai kes ke-719 nya ditemu negatif ungkup beperesa keterubah lalu kaul bukai deka beperesa kedua kali ba hari ke-10.

Nangkan nya, kes ke-732 nya siku lelaki peranak menua ke bisi sejarah pulai ngagai Sabah kena 19 ngagai 27 September laban pengawa dagang.

Kes udah ditemu positif Covid-19 kena 7 Oktober lebuh beperesa ba hari ke-10 kena 6 Oktober lalu nadai mantaika kelai kelimpah dikategori kes import B.

Nadai kes baru ti udah suman enggau dikemendar pansut ari sepital ngujungka bisi 684 iku tauka 93.44 peratus.

Kes ti agi diperubat ba wad isolasyen ba sepital nambah lapan iku iya nya 16 iku ba SGH, lapan iku ba Sepital Miri, tiga iku ba Sepital Sibu enggau dua iku ba Sepital Bintulu.

Kes pemati mengkang 19 iku tauka 2.60 peratus enggau bisi 16 PUI baru enggau empat PUI agi nganti pemutus makmal.