TANGKITN tu sebansa senyata tajam lama khas raban bansa Dayak Kanayatn ke diau mendam adap menua Kalimantan Barat (Kalbar) di Indonesia.

Peranak Batu Lintang Undop, Insol Harry madah, ari jerita ditusi bala bakih iya di Kalbar, Tangkitn tu suba dikumbai Parang Pandat ti nyadi senyata lama Perintah Bawakng.

Perintah Bawakng ku jerita asal ari peturun Dayak Bidayuh (Sungkung) nyentuk nyadi senyata khas etnik Kanayatn, Ibanic enggau Bidayuh.

Serak tu Insol mai kitai ngelansa mimit pasal senyata Dayak Kanayatn dikumbai Tangkitn ti tebilang nama, tampak rita kena ngayau kelia.

NYELAI GAMAL

NGERATAN JEMAN… Insol Harry

Ku Insol, bilah enggau mata Tangkitn tu ari besi ti dikambuh ba tempan, enda nyenyalah baka kitai ngambuh ilang enggau nyabur, senyata pengayau bujang berani menya.

“Ulu senyata tu bisi tukuh jungkang mimit lalu ujung iya betampuk kuning ti digaga ari utai ditempa segala tang nadai gagang baka duku Mandau ti ditempa ari kayu tauka tulang jelu.

“Sekali ngilas, pemanjai nyau deka sebaka enggau duku Mandau tauka baka Nyabur ku kitai di Sarawak ditu.

“Tang kebendar, ari gaya gamal Tangkitn enggau Mandau tu jauh bebida enti diperati silik, bisi penyelai ari bilah, mata enggau ulu duku,” terang iya.

Ngambika semua kitai nemu ku Insol, Mandau tu sebansa senyata pengayau raban bansa Dayak di Kalimantan lalu dikumbai tau ajih tauka bisi kuasa laban ulih terebai enti orang ke ngempu chukup enggau tinggi penemu.

MANDING… Pemanah ukir Dayak dikena ngelagu sarung Tangkitn.

Insol madah, Tangkitn tu dipegai ngena kededua jari lebuh betempuh ngelaban munsuh enti dibanding senyata jari bukai, sepiak jari aja ke megai.

Gaya gamal sebilah Tangkitn ti nyelai enggau pangkal iya bisi sudut 25 darjah, bilah mata urung 70 cm pemanjai seraya gagang iya panjai 40 cm.

Sarung suah agi digaga ari kayu tauka tanduk jelu lalu dilagu ngena bemacham ukir asal Dayak, dilinsu ngena gerenis pengudah kayu chukup rangkai ngambika teguh.

“Sida ti bagas nurun begiga enggau ngasu jelu sebelah kampung endang meruan ngalau bulu tauka lambar buk bechura mansau redam tauka uram.

“Lambar buk tu tadi lalu ditanchang sereta disangking ba ulu Tangkitn, diteju beburai ngaling keruntuk tulang, taring enggau pengaruh ti betekayun ke sama nyangking dia,” terang iya.

SENYATA LAMA… Gaya pendiau Tangkitn

RETI TANGKITN

Ku Insol, bisi mega bala kala nyebut nama bukai Tangkitn tu iya nya Bae Pandat dalam jaku raban bansa Bidayuhik Barat (Banyadu enggau Bakati).

Leka jaku Bae tu mai reti dulu seraya Pandat nya datai ari jaku uPAN (ari) enggau aDAT (adat) ti dipegulai nyadi PANDAT.

“Reti iya, Bae Pandat tu asal ari adat kelebih agi adat asal Dayak Bidayuhik iya nya etnik Banyadu, Bakati, jagoi, Sungkung, Bukar, Sadong enggau ke bukai.

“Pia mega jaku Tangkitn nya empu asal ari raban bansa Dayak Bidayuhik Barat – Banyadu enggau Bakati Rara, iya nya datai ari jaku Tangkadas ti mai reti ‘pemumpung’ enggau jaku dikitn nya ‘enggi aku’.

“Nya alai reti Tangkitn tu pemumpung (senyata) dipenggi aku,” terang Insol lenak.

Ari nya ku iya, kitai beratika Tangkitn nyadi senyata lama ti bisi dikena raban bansa Dayak Bidayuhik, Dayak Kanayatnik sereta Dayak Ibanik di Kalimantan Barat enggau Sarawak.

PENGARAP LAMA

Nampung randau silik agi, Tangkitn tu ku Insol suah dikena lebuh ngereja adat enggau pengawa ngaul pengarap lama kitai bansa Dayak.

“Ambika chunto, lebuh kitai ngambi manang belianka orang sakit ti dikumbai bala menyadi sepiak nyin Baliatn (baiotn), Badukun tauka Balenggang.

“Manang tauka beliau ti ngubat orang sakit ngena Tangkitn tu lebuh sida luput ngiga enggau nangkap semengat lalu dibai pulai ngambika semengat orang sakit badu liar agi.

“Kebendar, Tangkitn tu ke dinding bulu semengat manang ti luput nya tadi, ngambi semengat iya likun lalu pejalai belian mega mujur, nadai apa nama,” lansa iya.

Enti ba Sarawak ku iya nambah, kitai mega bisi ngubat orang ke diempa kayap ngena ai Ilang, ti ditemu sidi sereta ngasi.

Kelimpah ari nya, bisi sekeda ngena Tangkitn tu ngereja pengawa besehari sehari baka nurun gawa ke tanah begigaka lauk enggau lebuh nurun kumai.

“Senyata tu endang ditangkin sida ke lelaki lebuh mindah kena nyaga pengelikun diri laban kelia menua benung siga, bala munsuh semampai ngipa, dia kitai ilap mimit lalu ke dengah sida.

“Nya kebuah orang lelaki betangkinka Tangkitn, kena bejaga enggau nyikap diri napi sebarang penusah sebelah babas kelebih agi enti mindah kediri,” ku iya.

Nundaka nama enggau gamal iya ku Insol, tu endang senyata kena beperang, betempuh enggau munsuh ti datai nyerang enggau lebuh ngayau ngalahka rumah rumah munsuh.

Tangkitn tu ukai dikena kitai ngereja pengawa baka nebas enggau bebelaka pemakai, ukai kereban ke tau dimain tauka kena bemain laban ditemu berantu, kala basah enggau bedengah.

PENYELAI TANGKITN

Insol madah, siti utai nyelai pasal Tangkitn tu iya nya enda ibuh diansah ngena batu pengasah baka duku bukai.

“Enti kitai deka najamka mata Tangkitn tu semina diunsut ngena ai limau rangan aja. Enda ibuh ngena utai bukai.

“Taja pia, pengawa tu enda tau dikereja sebarang orang enti ukai orang ke ngempu Tangkitn nya empu nangika kitai tau alah bulu tauka dikumbai orang alah ayu.

“Chara ngunsut ai limau ba mata duku mega enda tau sengapa, maya tu mih orang ke ngempu Tangkitn nya besampi dalam ati minta diri gerai nyamai, bulih utai diniat,” ku Insol nyimpul randau enggau Suara Sarawak.