SERIAN: Nama kunteriktor ti ditemu ngemeranka ulah ‘Ali Baba’ lebuh bejalaika projek Perintah Sarawak deka dibuai.

Sapit Kepala Menteri Datuk Amar Awang Tengah Ali Hasan madah, pekara tu ngaul raban kunteriktor ti muntang bulih projek lalu udah nya nyual kunterik nya dikena ngulihka untung chara mudah nengah komisyen.

“Sida mesti bebendar gawa enti kunteriktor dekaka pengawa tu nyadika ‘periuk asi’ (penatai pemisi) sida.

“Sida ulih bekerejasama enggau kunteriktor bukai tang anang nyual kunterik (projek) pengudah bulih laban pekara nya nadai pulaika penguntung.

“Kitai ulih mujur enti bebendar kelimpah aku beratika mayuh sub kunteriktor ngagai serikat besai bejalaika projek besai baka ngaga rumah enggau begunan kedai ti mujur,” terang iya.

Awang Tengah mansutka jaku nya lebuh bejadika Simposium Pedagang Kunteriktor Renggat 12 ba sebuah hotel tebilang, ditu kemari.

Sama datai Menteri Muda Pemansang Orang Dagang sereta Dagang Mit enggau Jelan Pemesai Datuk Mohd Naroden Majais, Duta Khas Menteri Besai ke Asia Timur (Jipun, Korea Selatan enggau Taiwan) ti mega Kaban Parlimen Serian Datuk Seri Richard Riot Jaem enggau Adun Bukit Semuja John Illus.

Pia mega, Awang Tengah ti mega Menteri Dagang Entarabansa enggau Industri, Terminal Industri enggau Pemansang Orang Dagang ngelalau bala kunteriktor enda nyua tauka nyuwa lisin sida ngagai orang bukai.

Ku iya, pengawa baka nya ngujungka kunteriktor diadu orang bukai ke tau pulaika pengerugi ngagai sida empu.
Nangkan nya ku Awang Tengah, opis menteri iya udah ngemendar geran enggau pinjau ngagai mayuh kunteriktor nyengkaum pedagang mit enggau jelan pemesai (PKS) di baruh Pakej Bantu Khas Sarawakku Sayau (BKSS) naka 30 September tu tadi.

Iya mega madahka bisi 451 peminta udah dikemendar penyampau RM14 juta baruh Skim Kredit Mikro enggau 33 peminta penyampau RM4 juta dikemendar ungkup Skim Pinjau Industri Mit enggau Jelan Pemesai (SPIKS).

Ungkup Program Graduet Ngaul Diri ba Pengawa Dagang (GERAK), iya madah bisi 113 peminta udah dikemendar penyampau RM1.86 juta seraya RM2.68 juta agih belanja udah dikemendar ngaul 179 peminta Program Pedagang Teknikal enggau Vokasional (USTEV).

Ungkup Wang Turu Bantu Khas (SRF), Awang Tengah madah bisi 1,828 iku nganjung peminta udah dikemendar ngena agih belanja penyampau RM524 juta.