KUCHING: Seharitu Lubok Antu betukar ari status gadung ngagai kuning pengudah siti kes positif di menua nya dirikod kemari.

Nitihka penerang ari Komiti Penyangga Penusah Ngenyit Nengeri (JPBN) Sarawak, kes positif Covid-19 di Sarawak kemari ngerikod 10 kes ti ngujungka kes nambah ngagai 742 kes.

“Mungkur lapan kes udah diperesa lebuh pulai ari palan ngembuan penyakit Covid-19 ti tinggi (import B), siti kes beperesa Influenza-Like-Illness(ILI) enggau siti kes beperesa ti dikena rampit ditemu di Sarawak.

“Penyampau empat kes ditemu di pelilih Kuching, tiga kes di pelilih Lubok Antu enggau bela siti kes di pelilih Daro, Bau enggau Bintulu,”ku penerang nya.

Ku JPBNS, di pelilih Kuching tiga kes ti ngaul raban pengelikun ti baru pulai ari Sabah laban gawa ungkup Pengawa Bepilih Nengeri (PRN) Sabah empai lama.

Kelimpah nya, siti kes mega dirikod bela di Kuching iya nya ngaul siku pemesai penyaga pengelikun ti gawa di Padang Bilun Entarabansa Kuching (KIA).

Kes bisi beperesa kena 7 Oktober laban dikena rampit ari kes ke-718 lebuh gawa di Padang Bilun Entarabansa Kuching kena 2 Oktober.

Nangkan nya, di pelilih Lubok Antu dua kes ti bela diri menyanak (indai enggau anak) ari menua tu empu ti sama baru pulai ari Sabah kena 27 September lalu, sangkai ba KIA ari Kota Kinabalu.

Lalu siti kes ti ngaul siku raban penyaga pengelikun gawa di Lubok Antu. Kes tu beperesa Influenza-Like-Illness (ILI) sebedau dikenuku positif Covid-19 enggau kes tu bisi mandangka kelai pedis rekung kena 5 Oktober lalu.

Bela ngerikod siti kes iya nya pelilih Daro enggau Bau ti bela kena rampit pengudah pulai ari Sabah.

“Kes di pelilih Daro tu ngaul siku orang menua tu empu ti gawa di pelantar minyak di Sabah lalu kes mulai kediri ke Sarawak kena 3 Oktober ari Kota Kinabalu.

“Kes di Pelilih Bau mega ngaul siku orang menua tu empu ti baru pulai nemuai ari Sabah kena 27 September nengah Padang Bilun Entarabansa Kuching ari Kota Kinabalu,” ku penerang.

Berindik enggau nya, siti kes di Bintulu mega ngaul siku ‘penasihat penjualan’ di menua tu empu ti kala nemuai ngagai Semenanjung Malaysia kena 24 ngagai 27 September.

Kes tu mega bisi mandangka kelai kena rampit kena 1 Oktober, lalu beperesa RTK Antibody Covid-19 di sebuah sepital pribit di Bintulu tang pemutus peresa kena 1 enggau 5 Oktober negatif sereta beperesa baru di Sepital Bintulu kena 7 Oktober ti ngujung dikenuku positif kemari.

Berebak enggau nya, nadai kes baru udah suman enggau dikemendar pansut ari sepital ngujungka kes positif Covid-19 udah suman enggau dikemendar pansut ari sepital mengkang 684 iku tauka 92.18 peratus.

Nangkan nya, nambah 10 kes diperubat di sepital ti ngujungka penyampau nya nyadi 39 kes iya nya 24 di Sepital Besai Sarawak, lapan di Sepital Miri, empat di Sepital Sibu enggau tiga di Sepital Bintulu.

Ba penerang JPBNS mega madah nadai kes Covid-19 ti berubat ba ICU enggau kes pemati mengkang 19 iku tauka 2.56 peratus seraya 22 PUI baru diripot enggau tiga kes PUI nganti pemutus makmal.

“Siti kluster agi mengkang ngerekai di Sarawak iya nya kluster Bah Arnab di pelilih Kuching. Kluster tu mega mengkang ngerikod empat kes positif Covid-19.

“Di pelilih Kuching, Sibu, Lawas enggau Bintulu mega agi mengkang ba status kuning enggau 35 buah pelilih bukai di Sarawak mengkang ba status gadung.” ku penerang ari JPBNS.