BINTULU: Peranak ba kandang menua Samalaju dipinta ngetanka kaul penyerakup enggau pengelantang ba rumah panjai.

Kaban Kunsil Nengeri (Adun) Samalaju Majang Renggi madah, pekara tu beguna amat ngambi nyeliahka sida enda charut tauka pambar.

Iya nyemetak madah, kaul ke manah entara diri serumah deka ngemuntang semua pengawa kelebih agi bekaul pemansang rumah panjai dudi hari.

Majang mansutka jaku nya ba Pengawa Makai Selamat di Rumah Ngelambong Jarak, Batu 6, Jalai Bintulu-Miri, ditu ensanus.

Nambahka nya, Adun Samalaju nya ngelalau peranak dia kelebih agi nembiak enggau nembiak ti udah graduet mesti pintar ngerebut peluang ti disedia ba Samalaju ke begunaka mayuh pengereja.

Makit kereja sereta peluang bedagang ti disediaka tu ulih ngubah gaya pengidup sida kelimpah ulih munaska penyeranta enggau mantu nyungkak ekonomi ba kandang menua nya.