KUCHING: Projek ngaga Balai Raya Kampung Haji Baki ti beungkus RM1.2 juta udah berengkah digaga ensana lalu dipelabaka tembu dalam timpuh 12 bulan.

Chairman Kaunsil Kandang Menua (MPP) Lo Khere Chiang madahka balai raya nya siti ari semaya iya ngagai peranak genturung pendiau dia lebuh Pengawa Bepilih Besai Nengeri (PRN) 2016 nyin suba.

“Lemai tu (kemari) aku ngemataka program nyerahka Projek Ngaga Balai Kampung Haji Baki ngagai kunteriktor ti diberi tanggungpengawa.

“Aku berasai gaga laban pengujung iya projek tu digaga laban tu siti ari semaya ti udah dipadahka aku maya PRN 2016 suba lalu endang dianti peranak kampung,” ku iya.

Iya bejaku munyi nya ngagai pemberita ba aum pemberita Projek Ngaga Balai Raya Kampung Haji Baki ditu, ensana.

Kenu ku iya, enti udah tembu digaga balai nya ulih endur peranak kampung ngatur mayuh macham program baka baum, nikah, aktiviti enggau program bukai.

“Penyampau peranak ba kampung tu urung 6,000 iku, nya kebuah balai raya tu amat beguna ngagai sida ngatur mayuh bengkah program.

“Nyema udah tembu balai tu ulih ngundan urung 500 iku orang,” ku iya.

Tandu iya, balai nya siti ari empat iti projek pemansang ti digaga ba Kampung Haji Baki nyengkaum padang futsal, palan bedaja enggau tanah pendam.

“Padang futsal beungkus RM200 ribu udah tembu digaga, palan bedaja beungkus RM600 ribu agi nganti pemendar lalu tanah pendam ke beungkus RM200 ribu agi dalam perambu.

“Nya alai, ungkus ngaga semua projek tu penyampau RM2.5 billion laban genturung kampung tu besai.

“Mayuh agi projek bukai deka nangkan tu laban kitai ngembuan ketuai ti manah baka Abang Johari (Kepala Menteri),” ku iya.

Iya sekali agi meransang bala peranak kampung ngambika terus nyukung Gempung Parti Sarawak dalam mai Sarawak ngagai menua ti maju.

Sama bisi datai Penghulu Kampung Haji Baki Saptuyah Yusuf, ketuai kampung enggau bala bukai.