SIBU: Pemansang Jaku Iban ba pengawa betulis udah neresa tiga jeman.

Nitihka penemu dikunsi pengajar Peni Nyanggai, Jaku Iban mansang ba Jeman Rajah ari 1841 -1940 (100 taun), Jeman Koloni ari 1948-1963 enggau Jeman Malaysia 1963 nyentuk diatu.

Ku iya, Jaku Iban ukai semina nyadi jaku dikena bekomunikasyen aja tang dikena ba mayuh bengkah pengawa.

“Kesatu, Jaku Iban tu dikena ngatur pechara dalam Kort lalu kedua naburka program radio enggau ba jeman baru diatu dikena pengeluar program ba televisyen.

“Jaku Iban mega dikena ngarang bup ari Borneo Literature Bureau (BLB) ba taun 1958, diatu disilih (diambilalih) Dewan Bahasa dan Pustaka (DBP),” ku iya lebuh dirandau Suara Sarawak, kemari.

LANTING BANSA… Bala nembiak ti nemu pemesai reti belajarka Jaku Iban ngembuan ulah ti siru enggau angkunka jaku bansa diri.

Udah nya ku Peni, Jaku Iban majak mansang lebuh iya dipasukka dalam peresa Sarawak Junior Certificate Of Education (SJC) ba taun 1957 dientudika peresa Sarawak Junior Certificate of Education (SJC) tauka Lower Certificate of Education (LCE) tauka Penilaian Menengah Rendah (PMR) diatu disebut Penilaian Tahap 3 tauka PT3.

“Kitai mega temegah ati lebuh subjek Jaku Iban 6 dipasukka dalam peresa Sijil Pelajaran Malaysia (SPM) ba taun 2008 lalu Palan Pematih Pengajar (IPG) Kampus Rajang udah matih sida ti nyadi pengajar Jaku Iban berengkah 2014.

“Insiatif IPG Kampung Rajang ditunda palan pelajar tinggi lebuh Program Ijazah Sarjana Muda Perguruan Bahasa Iban dipejadi kena 5 September 2014 ba Hotel RH di Sibu.

“Diatu, Jaku Iban mega udah bisi dipelajar ba tikas Master Degree enggau PhD,” terang pengajar asal ari Nanga Tebalong Batang Oya.

Ku Peni, diatu ukai semina perintah menua Malaysia aja mekuhka pengawa ngajar enggau belajarka Jaku Iban tang mega bisi Gerempung Ukai Dikuasa Perintah (NGO) baka Serakup Pemansang Pelajar Jaku Iban (Aedil) endang ngemeranka pengawa ngemansangka Jaku Iban.

“Jalai udah dirembang udah dirandang sida ke tuai kelia, kitai diatu angkat nampung aja.

“Perambu udah nyegenda lalu pengulih sepengudah belajar Jaku Iban pan udah nyata.

“Nya alai, anang enggai belajarka Jaku Iban enti sema nuan endang peturun, tiris pantis ari bansa Iban, enda ibuh sebut ke bansa bukai.

“Sekalika kitai bulih A tauka enda, bepanggai ba pengepuh, pengeran enggau pemendar nuan belajarka Jaku Iban.

“Enti sema nuan deka bulih pemutus peresa ti manah, datai kelas luar sidang gaga semua latih ke diberi pengajar.

“Belajarka Jaku Iban ngemendar nuan belajarka subjek bukai baka Matematik. Bisi orang bulih A+ enggau A, aja orang ke bulih B+ tauka B, mimit ke pil,” ku peransang Peni.

Ungkup penerang, tanya peresa digaga ngena atur ti patut belalauka tikas 5:3:2, iya nya 5 (baruh/senang): 3 (jelan/sedang) :2 (tinggi/ tusah). Reti iya mayuh agi tanya senang enggau jelan ari ke tusah.

Ba KSSM tanya leka main enggau sempama semina ditagaka 10 mark lalu keretas peresa diperesa nitihka (Skema Penskoran/rubrik) baka subjek bukai mega.

Nambahka nya, Gred ditentuka ngena bell curve greding. Makin mayuh nembiak ngambi subjek Jaku Iban, majak mayuh deka bulih A+ tauka A.

“Belajar mih subjek Jaku Iban laban jaku tu identiti bansa kitai empu, kitai belajar awakka kitai nemu nulis, mending enggau bejaku ngena jaku nya enggau betul, engkeman sereta betelipi.

“Enti kitai landik, dia kitai nemu mansutka penemu ngena jaku nya, empas jaku nya mega dalam agi didinga.

“Nya alai anang ningaka penemu ti pabu, penemu ti tau ngasuh kitai saru tauka penemu ti enda menuku mai bala anak uchu ichit wit, kitai sekaban tauka kitai semenua enda belajarka Jaku Iban ba sekula.

“Ba aku, penemu baka tu semina jaku emba aja, jaku sengapa, ukai jaku angkun ukai jaku siru ka jaku bansa diri,” ku iya madah nyemetak.