Stesyen televisyen Sarawak (TVS) siti pemujur digaga Perintah Nengeri awakka mensia mayuh ulih meda mayuh pekara ti nyadi di selampur nengeri tu.

Berambaika jaku ‘Baru sereta Meri Peransang (Segar dan Memberi Inspirasi) ngayanka TVS tu ulih dipeda semua renggat umur.

Dinga mih randau pemberita Suara Sarawak enggau Sarawak Tribune iya nya JONATHAN JIP enggau SITI

NURAIN RATANI begulai enggau Ketuai Pemesai Eksekutif (CEO) TVS, Suhaimi Sulaiman.

Suara Sarawak: Naka ni timpai tuan Suhaimi Sulaiman beratika pemujur perintah nengeri numbuhka TVS tu?
Suhaimi Sulaiman: Ba aku, mayuh chara dikena nyapai juluk nyadi sebuah stesyen televisyen ti mujur, baka ngisi tauka nambahka program enggau pengerembai industri kreatif endang patut dikemerat. Ari nya, raban pengeluar program deka ransing agi ngasilka baka bekaul sebana komuniti.

Ketuai Pemesai Eksekutif TVS, Suhaimi Sulaiman

TVS mega deka ngelakuka Sarawak nengah mayuh program ti ngaul pesaka rampa menua enggau main asal. Pekara nya manah laban ulih matak bala temuai kitu.

Pemujur iya mega bepanggai ngagai penyampau orang ke meda. Sekeda program enda nyapai tikas dikeandal laban nadai orang meda. Program ti kurang orang meda baka bekaul enggau inovasyen, bedagang enggau ke bukai. Nya alai kitai patut landik mutar pekara nya.

Nama kebuah TVS milih Astro Malaysia Holdings Berhad (Astro) nyadi pelasar endur mansutka stesyen tu?

Mayuh komuniti di Sarawak udah bisi astro nitih pansik lebih lebih 80 peratus di Sarawak. Taja pia, dudi hari kami bisi perambu mantaika iya nengah MyTV. Nya alai, diatu kami benung berunding ngerembaika iya nengah pelasar media rama baka Youtube, Facebook, Instagram enggau ke bukai.

TVS tu kebendar perambu ke chukup lama tang tejanggal. Nama komen tuan sentang pekara tu?

Kami meda nengeri Sarawak diatu bulih japai arus penyambung ke lebih manah. Nya alai, integrasi nasional beguna amat laban Sarawak ngundan mayuh cherita ti engkeman dipandang ngagai dunya luar.
Nya alai, TVS nyamai dipeda laban bisi disedia jaku salin Melayu enggau English.

Naka tu mega, aku meda mayuh jalai cherita ti manah udah digaga anak Sarawak. Nya alai aku meda penau isi program endang ulih dibantai ngagai dunya luar. Peluang stesyen tu ngerembai ngagai menua luar chukup besai kelimpah ulih nyungkak ekonomi di Sarawak.

Kati gaya iklan ba TVS tuan, nama kini pemar ditapi?

Nyadi sebuah produksi ti agi baru tu endang siti pemar ba kami. Sebedau nya kami deka matak orang mayuh meda TVS, uda nya baru kami ngerunding iklan ke patut dibantai setipak enggau kualiti program ke bisi dibantai.
Diatu kami fokus nyendiaka kereban ke bekualiti dikena narit ati mensia mayuh.

Bakani TVS tu nyendia peluang gawa ngagai mensia mayuh?

Enti nitih, piak TVS deka ngambi staf manggai 250 iku, tang naka diatu bedau datai 100 iku.
Nya alai, kami ngelaluka bala direktor drama, animasyen, pematak randau enggau ke bukai di Sarawak besaup ngemansangka sereta nambahka program ba TVS.

Naka tu, kami agi nganti enggau nerima sebarang buah runding ti kreatif ari komuniti dalam ngemansangka industri kreatif di Sarawak.

Kelimpah nya, stesyen televisyen tu deka nyungkak pengerembai industri kreatif ti deka muka mayuh peluang ungkup raban industri ti deka ngasilka cherita peranak menua tu empu ti ulih nambahka industri ti kreatif menua tu.
Enti buah runding nya manah sereta kreatif tetap diterima kami lalu bantu belanja deka disedia dikena mantu sida.
Nya alai, kami muka mayuh peluang ngagai sida ti deka mantaika sereta ngerembaika pengelandik tauka penemu sida awakka ulih mai Sarawak seriris enggau panggau Hollywood.

Ngelansa pasal pemansang, bakani TVS deka mandangka pemansang di Sarawak ngagai mensia mayuh?
Pekara ti dikemerat iya nya bakani rayat ulih nerima pemaik ari TVS tu. Kitai mantai informasyen ukai semina nengah siti jalai aja, tang mega nengah media sosial enggau kebukai.

Ari TVS baka raban pedagang di Sarawak ulih ngelakuka produk sida?

Aku setuju enti nuan madah pedagang ulih ngelakuka produk sida nengah inisiatif baka TVS. Di Sarawak ngembuan mayuh kereban ti nyelai enggau manah baka koleksyen keringkam, kantung digaga bansa Penan enggau ke bukai.

Nya alai, enti rayat di Semenanjung Malaysia deka meda pemanah produk di Sarawak, sida patut muka TVS ngambika ulih nemu pemanah sereta milih produk dikerindu sida.

Lima tauka 10 taun ti deka datai nama sadang tuan bekaul enggau TVS?

TVS disadang terus dikerinduka mensia mayuh laban mayuh ngangkatka isu komuniti nyengkaum pemansang di nengeri. Kami ba TVS mega ngelaluka timbal ari komuniti awakka kami nemu nama pengurang kelimpah ulih nyeleti pengurang nya nyadi lebih bekualiti. Kami semampaika ngelalauka buah penemu ke manah ari semua kita.