SIMANGGANG : Kaban Kaunsil Nengeri Simanggang Datuk Francis Harden Hollis ngelalau mensia mayuh ba sitak nya anang enda berunding enggau panjai sebedau ngaga pemutus (milih pengari rayat) ambika penguntung nembiak rebak baru jemah.

“Aku mega ngarapka bala tuai rumah ti udah dipadu mangku tanggungpengawa mega ulih bepikir panjai dalam nentuka tuju kuing peranak ba baruh pegai sida.

“Anang sesekali kitai ngaga pemutus ti tau meri pengerugi ngagai diri empu lebih agi rebak baru ketegal penyilap ari kitai diatu,”ku iya.

Iya madah munyi nya rambau bejadi Program Betanam Betupi Ngaul Komuniti ti diatur ba Rumah Jerry Lai Sinyap,Siga, Jalai Paip ditu apin lama ke udah.

Nambah nya ku iya, Pengawa Bepilih Besai Kaunsil Nengeri (PRN-12) majak ngansak sesemak lalu mayuh mega sekeda orang enggau nadai mua malu bejaku mantah sereta bejaika perintah.

“Kebendar sida ti bejaku munyi tu laban berasai enda lantang ati sereta chemburu laban perintah GPS ulih ngatur pemansang ungkup rayat.

“Kelimpah sida mega nguji deka mecah runding mensia mayuh lebih agi ba menua pesisir,”ku iya.