Sebuah stesyen televisyen ke dipenggi perintah Sarawak tauka dijaga Sarawak Media Group (SMG) iya nya TVS udah ulih dipeda mensia mayuh bepun pukul 6 pagi kemari (10 Oktober) nengah Astro channel 122.

Kepala Menteri Sarawak, Datuk Patinggi Abang Johari Tun Openg sebedau tu endang udah madah, TVS tu deka dipenyadika Tuai Pemegai Menua (TYT) Sarawak Tun Abdul Taib Mahmud malam tu legi beserimbai enggau Pengerami Ngintu Hari Pengada iya ke-84.

Tu endang siti berita manah lebih agi ngagai raban pengemeran industri kreatif di nengeri tu laban tu peluang endur sida mandangka mantaika pengelandik diri baik nya pengawa ngaga filem, dokumentari, animasyen, drama, berita tauka program-program kreatif ti dipanchar terus ari TVS.

Reti industri kreatif iya nya pengawa ngangkatka pengelandik sesiku orang tauka bala mayuh bepelasarka kreativiti, inovasyen enggau teknologi ti dikeandal ulih meri penatai pemisi ngagai ekonomi enggau nguntungka menua.

Abang Johari rambau bejadi Kapit Town Square di Kapit madah, TVS tu dikeandal dikena ngidupka baru Pekit Bintang P.Ramlee enggau Pekit Belaban Penemu Trofi Kepala Menteri ti nadai agi diatur beberapa taun ke udah.

 

Ku iya, dua bengkah pekit nya nadai agi diatur tauka dipandang ba TV pengudah Perintah Besai dipegai Perintah Pakatan Harapan nginsil dua bengkah pekit nya.

Nyadi nengah penumbuh TVS nyangka mayuh agi penau anak-anak Sarawak ulih dikerembai ba pengelandik belagu. Sekeda penanyi tebilang endang asal ari Sarawak baka Dayang Nurfaizah, Bob AF, Hafiz Suip enggau ke bukai.

Nyangka ari TVS mega, kitai Iban ke endang dikelala mayuh pengelandik ba pengawa belagu, chukup manah nguna pelasar tu endur ngiga penanyi baru nengah pekit-pekit ke ulih dichunto baka ‘Bintang RTM, Akademi Fantasia, Mentor, Kilauan Emas’ enggau ke bukai.

Kelimpah ari industri pemerindang nengah TVS mega, kitai ulih mantaika pengaya main asal pupu bansa ke bisi di nengeri tu ngagai menua luar. Di nengeri tu kitai bisi bansa Iban, Melayu, Melanau, China, Bidayuh, Orang Ulu, Penan enggau ke bukai bela ngembuan adat enggau main asal ke nyelai sereta manah dibantai ngagai menua luar ungkup sukut ngelakuka industri dagang temuai.

Ba sukut berita ke nyadi di nengeri tu mega, enti sebedau tu, berita ari nengeri tu semina dibantai sekerat dua nengah stesyen berita RTM nyangka laban jam mantaika berita kelalu pandak. Tang udah tu, iya ulih dibantai silik agi laban awak ti udah besai iya nya berita enggi kitai ari Sarawak aja.

Berita ke dibantai ari TVS mega ulih serap datai ari selampur nengeri tu baik nya berita ke nyadi ba kandang mengeri tauka menua pesisir. Nyadi tu peluang tu pemberita mantaika sebana, penusah rayat ke agi tubah pedis sereta beguna perati ba sukut pemansang lebih agi ba kandang menua ulu.

Nya alai, kitai rayat endang ngandal amat TVS tu ila dibuka ukai semina nyadi gendang terantang dikena nebah berita politik tang mega patut sebela ba semua sukut sereta nadai bechiping mantaika bemacham pekara enggau berita ti meri pemaik ngagai semua anak Sarawak baik nya ba sukut ekonomi, dagang, seni, pendiau rama, lansa pemansang enggau ke bukai.

Ba lansa penerang dibantai Ketuai Pemesai Eksekutif TVS, Suhaimi Sulaiman dia nyemetak iya madah, TVS chukup tebuka ba semua pekara, sedia nerima penemu ari mensia mayuh ke pemaik TVS. Kelimpah ari nya iya madah, TVS endang pelasar ke manah meri peluang ngagai peranak nengeri tu ngerembaika kreativiti diri.

Kenu ku iya, asil karya ti bekualiti nadai salah dikenatai ngagai piak TVS awakka ulih dibantai ngagai dunya luar. Tuju TVS dibuka endang dikena ngangkatka nama menua Sarawak ngambika nengeri tu terus dikelala dedini endur sereta matak temuai luar datai kitu.

Kemari mega penulis bisi muka TVS lalu ari perati keterubah endang chukup manah sereta patut dipuji laban bepenau ngerembai angkat enggau diterima mensia mayuh.

Tusun program ke dibantai mega ngemantup ati, mayuh program ti bebadas ambika banding baka ‘Rezeki Air’, Rythm of Borneo, Sada Kenyalang, Iban Global enggau ke bukai.