BISI sepun kayu teras mali tumbuh ba tebing kiba sungai Meruji, enda jauh ari ili Jematan Meruji ba jalai Ulu Kabo.
Tuai Rumah Serudin Ason madah, teras tu kurang lebih 20 kilometer (km) ari pasar Saratok.

“Sapa bagi ke deka ngabas enggau meda pemanah pun kayu Teras Mali di Meruji, Kabo tu, kita mansang kia ngena entukar nengah Jalai Awik – Kabo.

“Teras tu pegari jerita bepun ari jerita aki ini kitai kelia ke benama Umbol enggau Sabang lalu ditampung ngagai rebak diatu.

“Rambau tu kelia kitai Iban udu begiga menua alai diau, ngentapka pendiau diri ba menua baru.

“Sida balat ganas begigaka menua ke manah alai bumai sereta nyamai alai begigaka pemakai baka jelu enggau ikan,” ku iya ngepunka randau.

GAH… Kayu Teras Mali ba Meruji, Kabo agi bediri tegap nyentuk seharitu.

Kelimpah ari nya ku Serudin ti asal ari menua Semambu Ulu ba Kabo, sida ti berumpangka menua tu mega udu bejalai matau menua begigaka kayu Tapang.

Kebuah pia laban maya tu sida balat begigaka lilin manyi ungkup dijual, kena ngiga belanja laban tu siti barang ti berega maya tu kelia.

“Nya alai maya tu, taja Umbol enggau Sabang udah mendam diau di Babang tang seduai apin puas.

“Seduai lalu bejalai ari Babang matau menua ke Kabo. Mudik Kabo lalu ngulu Sungai Meruji.

“Lebuh hari nyau lemai, seduai ke bejalai neresa kampung nya tadi lalu bemalam ba emperan semak pun Teras sekayu.

NAMPUNG JERITA TUAI… Tuai Rumah Serudin Ason

“Malam tu dia siku ari seduai bisi mimpi. Mimpi asaika gali ba baruh rumah orang.

“Malik iya katas, dia orang lalu nyapa. Orang nya tadi ngangau nanya nama main seduai tinduk ba baruh rumah sida lalu madahka diri Bunsu Tuchok.

“Antu tu tadi lalu madahka teras nya mih rumah iya lalu bepesan, enti sema dudi ari pegila lusa kita bisi jai burung tauka jai mimpi tau anjung kia laban iya nemu nabarka mimpi jai tauka burung mali,” lansa Serudin enggau silik.

Nya alai ku Serudin, nyentuk seharitu mensia ti diau ngelinggi teras tu selalu nganjung mimpi jai ngagai teras nya.
Iya madah, enti kitai semak ngagai pun teras tu bisi kitai meda duit seling temera sebelah pun teras tu.

Duit nya diberi ke sabang orang ti nganjung mimpi tauka burung kia lalu diatu pun teras tu udah dipagar, terang iya.

TAU NABAR MIMPI… Sabang orang orang ke jai mimpi tauka burung ti datai kia nabar mimpi sida.