SARATOK: Piak pengeluar program Iban ba TV Sarawak (TVS) dikearap ulih ngena jaku Iban standard dalam semua program ti dibantai.

Pemantu Direktor Sektor Pelajar (Unit Jaku Iban) Opis Pelajar Nengeri (JPN) Mariam Sabai muji pemujur perintah ti udah numbuhka TVS lalu ngarapka program dikeluar lebih agi bekaul enggau jaku Iban ulih nitih leka jaku Iban standard tauka tulin.

“Kebuah pia laban ari pemadas leka jaku ke diguna sida deka nyadi chuan dititih mensia mayuh lebih agi rebak baru. Pia mega nengah chara ngena leka jaku ti nemban deka ngujungka kitai dibasa sereta terus pegari.

“TVS ulih nyadi siti ari pelasar ke engkeman dikena kitai ngerembaika jaku Iban awakka didinga ba serata dunya.

“Tu siti peluang ti chukup manah, enda tau dibasau ngapa laban ngelama tu enti diperati ba RTM pedis kitai deka mendingka program ke lama ngena jakuIban dibanding enggau TVS,” ku iya madah pengagit diri ngagai Suara Sarawak.

Nangkan nya, Mariam arapka program bukai baka sentang Daya Idup, Main Asal, Pengelandik Jari, Pelajar Jaku Iban, Peransang Pengidup Iban patut bisi dibantai jemah.

“Arap piak TVS ulih numbuh siti slot tauka program khas alai peranak menua tu mantaika sada tauka penanggul sida bekaul enggau pemansang infrastruktur enggau ke bukai ba menua diri.

“Kebuah pia, laban agi mayuh peranak ba genturung pendiau sebelah entigis ulu sungai enggau menua pesisir apin ngasai tauka ampit pemansang baka jalai alun, bekal kuasa karan, arus internet/telefon enggau bekal ai beresi,”ku iya.

Mariam asal ari Saratok, udah ngajar jaku Iban pengelama 26 taun ba sekula primari di Saratok sebedau diambi gawa ba JPN di Kuching bepun 2014