KUCHING: Pemansang dipejalai Perintah Nengeri udah meri pemaik ngagai selampur nengeri Sarawak enda ngira sekalika ba mengeri tauka menua pesisir.

Kepala Menteri Datuk Patinggi Abang Johari Tun Openg madah, ngaga semilan buah jematan nyadika penyambung ngagai semua menua pesisir Sarawak ti mega nyadika kelai Perintah Gempung Parti Sarawak (GPS) seruran ngemeratka ka rayat.

“Kitai deka terus ngemansangka tikas infrastruktur, industri baru, teknologi enggau pengawa betanam betupi chara komersial ungkup ulih ngemansutka mayuh asil pemakai sereta ngangkatka lebih mayuh peranak di menua pesisir ari sukut pengelandik sida ba pengawa nya.

“Mayuh program pemansang ti benung diperambu tauka dipejalaika nya kelai kitai udah merdeka kelimpah deka ngenegapka agi perintah GPS,” ku iya.

Abang Johari bejaku munyi nya lebuh meri licha beserimbai enggau pengawa Ngintu Hari Pengada ke-84 taun Tuai Pemegai Menua (TYT) Yang di-Pertua Nengeri Sarawak Tun Pehin Sri Abdul Taib Mahmud, malam ensana.

Ku iya, ngaga projek Jalai Alun Pan Borneo (LPB) Sarawak pemanjai 786 kilometer ti bepun digaga ari Oktober 2015 ti ulih nyadika penyambung ari genturung Telok Melano di selatan ngagai Lawas utara Sarawak udah bisi mandangka pemansang baru.

Nangkan nya iya madah Perintah GPS mega deka bejalaika pengawa ngaga jalai alun kedua (Second Trunk Road) ti ulih ngemuntang pejalai ari Kuching ngagai pelilih bukai baka ke Sarikei, Sibu enggau Kapit.

Jalai alun ti udah bisi di menua pesisir mega deka diadu enggau lebih bekualiti agi, ku tandu iya.

Berindik enggau nya, Abang Johari mega madah rayat di Pelilih Kapit diatu enda agi tinggal ari arus pemansang baka jalai alun ari Sibu ngagai Kapit ti udah ulih ditengah taja bedau tembu penuh.

“Jalai alun tu udah tentu meri pengelantang ngagai peranak di Kapit enggau nya mega perengkaguna infrastruktur ti beguna ungkup pemansang menua nya.

“Aku andal ari sukut dagang temuai di pelilih Kapit enggau Baleh deka majak ngerembai agi laban enda agi ngandalka pengangkut ai,” ku iya nyemetak.

Berebak enggau nya, Perintah Nengeri mega semampai ngemeratka sektor utiliti iya nya ngemansangka bekal utiliti nya ari nengeri ngagai menua pesisir.

Naka tu, lebih 84 peratus bekal ai beresi ti disedia di Sarawak iya nya peranak diau di nengeri ka mungkur semua bulih bekal ai beresi tu enggau 67 peratus ungkup peranak di menua pesisir, ku tandu iya.

“Mungkur 97 peratus peranak Sarawak udah bulih pemaik bekal kuasa karan 24 jam enggau statistik mandangka lebih 93 peratus genturung menua pesisir di Sarawak bulih pemaik bekal kuasa karan tu,” ku iya enggau silik.

Ba lansa ke sama, Abang Johari mega madah pemansang ‘sumber manusia’ siti faktor ti beguna ungkup nyungkak nengeri Sarawak nuju Industri 4.0 Perintah Nengeri.

“Nya alai perintah deka numbuhka Sekula Sekondari Entarabansa Yayasan Sarawak (Yssis) ti nguna sukut pelajar International General Certificate of Secondary Education (IGCSE) ari piak Cambridge Assessment International Education Board.

“Sekula entarabansa keterubah tu digaga di Semenggok ti udah dilancharka kena 22 September empai lama kelimpah pengawa nya mega mandangka Perintah GPS ngemeratka tikas pelajar nembiak di Sarawak ti ulih nitihka singkang pemansang dunya,” ku iya.