LUBOK ANTU: Skim Kaunsil Pengempung enggau Pengintu Tanah Sarawak (Salcra) udah mantaika sekeda inisiatif mantu nambahka pemansut enggau penatai pemisi sereta ngempu Tanah Adat Bansa Asal (NCR).

Sapit Kepala Menteri ti mega Chairman Salcra, Datuk Amar Douglas Uggah Embas madah, sida udah ngena sanding penemu ari Sime Darby ngambi mansik bakani ngemansangka ladang ke ulih mansutka mayuh asil.

“Kami deka belajar ari Sime Darby ngambi mansutka mayuh asil laban nya serikat besai sawit ti tegap enggau bisi ladang ba selampur menua.

“Kelimpah bisi ladang ba menua tu, Sime Darby mega ngerembaika pengawa nanam sawit ba Indonesia.

“Batang tuju pengawa tu dikena nambahka pemansut kitai ari 15 tan sehketra diatu ulih nambah ngagai 20 tan.

“Nya kebuah, kami ngarapka piak perunding ulih nyuaka ripot sida,” terang Uggah.

Uggah ti mega Menteri Betanam Betupi Moden, Tanah Adat enggau Pemansang Kandang Menua mansutka jaku nya lebuh bejadika Program Polis Komuniti ba Rumah Meritian Melintang di Merindun, ensana.

Ku iya, inisiatif nya setipak enggau pemansang kemaya hari ti mayuh ngena teknologi moden.

Ambika banding ku iya, baka ngena dron enggau aplikasyen Internet of Things (IoT).

Nambahka nya ku iya, sepenyampau urung 1,000 iku chapi diimport ari Australia udah dilepas ba ladang nya.

Iya mega merambu nirika endur nupi chapi ngambi ulih nambahka chapi ti udah diimport ari Australia nya.

Bekaul enggau hak ngempu tanah, Uggah madahka raban penyukat Salcra ke baru udah tembu belatih nengah Opis Tanah enggau Survei.

“Sida deka dianjung gawa ngagai pelilih enggau ladang ngambi ngepunka pengawa nyukat tanah di baruh Seksyen 18 enggau Seksyen 6.

“Diatu, kami bisi urung 300 iku pematih ti nyukat tanah nya,” ku Uggah nerang.

“Nya alai, aku ngarapka pengempu tanah deka bulih hak sida enggau naka pengelengkas,” tandu iya.

Ba pengawa nya, Uggah udah nyuaka surat dichiri ngagai Tuai Rumah enggau Sekretari Komiti Pemansang Enggau Pengelikun Genturung Pendiau (JKKK).