Mulaika pengingat diri urung taun 1986 kelia, mayuh macham pengingat semampai dikenang nyentuk ke diatu. Maya nya umur penullis baru manggai 7 taun, jeman ‘tebal pending’ tauka tubah manchal genap jaku rara apai indai muti ngerimbas pending aja.

Maya kitai gauk begulai enggau bala bakih ke serambau, bemarin enggau diri serumah sebelah letung lama enda jauh ari rumah. Nyadi semua nya tusah deka padam ba lubuk ati.

Sekeda ari kenang nya bisi nyadika malin ngidupka diri lebih agi diatu udah manggai lebih setengan umur nuju jeman bulih uchu.

Beserimbai enggau pemujur Perintah Sarawak numbuhka stesyen televisyen kediri ke dikumbai TV Sarawak (TVS) nyadi penulis rindu ngelansa kenang suba enggau diatu.

Suba taun 1986 apin mayuh kitai di rumah panjai ulih bebelika kereban televisyen tauka radio baka diatu. Ukai ketegal kitai enggai beempu keresa pemerindang ke baka nya, tang nyangka maya nya apai indai kitai tusah teulihka belanja laban pendiau penatai pemisi ekonomi kitai empai menyana baka ke dipeda seharitu.

Rumah Panjai Empelaie Ulu, Saratok maya taun 1986 kelia.

NGUSUNG BILIK ORANG

Tambah mega maya nya kelia, penyampau orang ke nguan sesebuah rumah panjai enda bangat mayuh. Kengka bisi ke bisi ba sebuah rumah panjai endang tuchi diri sebala tauka kaban belayan. Nya kebuah, nyema sepintu bisi televisyen kitai nadai rawan datai ngusung bilik orang bukai bela begulai bepedaka cherita dalam televisyen analog ke bisi disedia Radio Televisyen Malaysia (RTM) maya nya ke dikumbai TV1 enggau TV2.

TV bukai baka TV3 anang nanya enda ulih peda laban kelalu balat bepetir enti kitai ke diau ba rumah panjai di menua pesisir sigi tusah deka meda stesyen TV3.

Ukai baka diatu, jeman televisyen betukar ngagai digital semua utai nyau dipeda ba tunjuk jari. Nyangka jarang agi sida nembiak diatu bepedaka televisyen taja pendiau TV nyau majak manah tauka terang. Sida ke biak lebih rindang bepedaka telefon chulik tauka telefon pintar.

Jeman 80-an suba mega kitai di rumah panjai agi bepedaka TV putih chelum ke nadai chura baka diatu. Bukti iya kitai ulih ngerebakka sebelah Youtube ba filem P.Ramlee. Nyadi nya mih nyata ngayanka pendiau cherita ke bisi ayan ba televisyen maya nya suba.

Pengingat ngenang pengurang ke diasai maya kelia dibanding enggau diatu ulih ngundang ati sinu dichampur pengingat manis. Laban kitai patut berunding positif enti nadai ke lama tentu nadai ke baru. Pia mega, utai dikemisi kitai diatu. Enti enda ketegal pekara ke nyadi suba tentu ga pendiau aku enda baka tu, pia mih pikir kitai meransang ati diri awakka enda terunda-runda enggau penusah kelia patut dianggap kitai putar tauka pusin dunya nuju pemansang.

Mensia mayuh ke serambau tauka lebih tuai ari penulis tentu bela ngasai pekara diasai aku, baka ni kitai kelia duduk begelumu bekedungau lelengak berimbai ngemata televisyen enggau bala nembiak ti sama rebak tauka lebih tuai ba bilik orang bukai. Kati enda sinu kini kita wai seberai?

Bala anak rindang bepedaka TV digital.

PROGRAM TV DIKERINDU

Program TV ke pemadu dikerindu maya nya suba baka cherita Tamil, Main Bol (Rindu meda Tim Sarawak), Gusti (jeman Hulk Hogan enggau Andre The Giant) enggau cherita Power Rangers.

Agi ingat, enti lebuh maya bisi cherita orang gusti tauka belaban main bol, bilik orang sepiak ti bisi TV endang dedat alai mensia mayuh ari bilik bukai datai ngusung.

Kami ba Emplaie Ulu,Saratok maya nya kelia agi betengau ngena api kelita lalu siku sepintu mesti nungkun kelita ba ruai diri empu. TV ke dipeda main chaj ngena bateri.

Ketegal apin bisi kuasa karan, televisyen maya nya semina ulih dipasang ngena kuasa bateri entukar ti disambung enggau tali wayar bechura chelum enggau mirah.

Sebedau siti-siti cherita dikerindu pansut,dia atur mupu duit dulu dipejalaika kami sebuat dikena ngumpul belanja kena mayar ungkus rega ngecas bateri ba kedai cina di Pasar Saratok.

Kelia ungkus ngecas bateri agi murah iya nya RM4 aja nyengkaum tambang numpang perengka pengangkut orang tauka bas kompeni.

Perengka pengangkut ti suah alai kami bekirum maya nya suba iya nya Bas Sarawak Transportation Company (STC) tauka suah ditela kami bas Jipun.

Bisi sekali penulis enda ingat nyuaka duit pupu dikena ngecas bateri kena ukum bala bakih enda diasuh meda kunsi meda TV.

Tang pengekih deka meda cherita ke dikerindu diri sanggup ngiga lubang dinding ke teteling awakka ulih meda cherita dikeingin ati.

JEMAN TV DIGITAL

Nya mih pemar kelia, diatu semua nya tentu berubah. Ekonomi udah menyana mayuh udah ulih meli TV mipis tauka lekat di dinding chap Panasonis,Toshiba, Sharp enggau ke bukai nitihka pemesai dikedeka diri.

Diatu nyau masuk jeman digital semua televisyen ke dijual sebelah pasar udah diubah ari TV analog ngagai TV Digital ulih dipeda nengah Myfree Digital TV.

Ke pemadu baru mega kitai di Sarawak udah bisi TVS nyadi nya pemansang ke pemadu baru diasai kitai rayat di nengeri tu. Tang TVS semina ulih dipeda mensia mayuh ke bisi Astro ba channel 122. Taja pia, program TVS Sarawak nyangka deka dikemanah perintah menua kitai masuk MYTV ba taun ti deka datai.

Tu mih ubah pemansang ke patut dipuji enggau ngemegah kitai rayat di nengeri tu. Arapka nengeri Sarawak terus mansang lalu stesyen TVS ulih ngerembaika bemacham berita ari selampur nengeri ke pemeri pemaik ngagai semua rayat di nengeri tu.

Kitai mega ngandalka TVS nyadi stesyen televisyen ke ulih ngangkatka adat enggau main asal pupu bansa di menua tu awakka menua luar ulih enchelak mata meda pengaya pemanah rampa menua enggau adat di menua kitai.

Penulis UBAN DANA