KUCHING: Opis Pelajar Nengeri Sarawak (JPNS) udah ngeluarka gerah nutup Sekula Sekondari (SMK) Bandar Bintulu pengelama tujuh hari (seminggu) bepun 10 nyentuk16 Oktober tu.

Sekula nya ditutup ungkup pengawa meresi enggau sanitasyen laban ditukuka bisi kes berampit Covid-19 ari Opis Sapit Ketuai Direktor Pelajar Malaysia.

Pia mega, Komiti Penyangga Penusah Ngenyit Nengeri Sarawak (JPBNS) madahka Sarawak seharitu ngerikod siti kes baru positif Covid-19 di Kota Samarahan ngujungka kes nambah ngagai 752 kes.

Chairman iya, Datuk Amar Douglas Uggah Embas madahka kes ke-752 nya siku lelaki peranak menua ti gawa nyadi supervisor ba sebuah serikat ngaga begunan di Kuching.

Lelaki tu kala bejalai ke Kota Kinabalu, Sabah kena 20 September tu tadi enggau sangkai ba Padang Bilun Entarabansa Kuching (KIA) kena 1 Oktober tu tadi.

Iya ditemu positif Covid-19 lebuh beperesa rT-PCR ba hari ke-10 enggau nadai mantaika kelai kena rampit Covid-19.
Nambahka nya, iya udah dipasuk ba wad isolasyen Sepital Besai Sarawak (SGH) ungkup atur bukai lalu ditemu kena rampit lebuh ba Sabah.

Naka tu, Sarawak ngerikod dua kluster ti agi ngerekai iya nya Kluster Bah Arnab di Kuching ngaul empat iku ke alai 40 iku udah beperesa, 32 iku ditemu negatif Covid-19 lalu empat iku kaul agi nganti pemutus makmal.