KUCHING: TVS deka dipandang nengah DTT (Televisyen Digital) taun baru (2021) iya nya dipandang terus ari MyTV sereta enda bebayar.

Kepala Menteri Datuk Patinggi Abang Johari Tun Openg madahka nengah strategi ti bebida enggau perambu nyual ti nyelai, iya pechaya TVS ulih pansut ba bidang pemadah nasional.

“TVS enda semina mantaika pekara dalam menua tang nyadi pemain televisyen serata dunya,” ku iya.

Abang Johari bejaku munyi nya lebuh bejadika TVS di Palan Aum Borneo Kuching (BCCK) ti dipenyadika Tuai Pemegai Menua Tun Pehin Sri Abdul Taib Mahmud, malam tadi.

Nya alai, iya meransang bala pemain kreatif di Sarawak ngambika terus bejalai begulai enggau TVS mantaika penemu baru enggau teknologi ti manah.

STAF TVS…Raban staf TVS sampal niki ke panggau ngambika dikelala mensia mayuh ke bisi datai rambau bejadika TVS di BCCK ditu, malam tadi.

“Enggau TVS, aku pechaya mayuh agi peluang ungkup rayat Sarawak nyulut ba mayuh bengkah program ti dibantai.

“Pia mega, mayuh pengawa puang daka ayan udah tu laban pejalai penatai pemisi deka tumbuh dalam ekosistem ekonomi digital,” ku iya.

Abang Johari nandu, TVS ukai semina pelasar dikena rayat pupu bansa ngulihka berita menua, nasional enggau dunya tang mega nyadi pelasar negapka integrasyen nasional pupu adat enggau main asal.

“Aku ngarapka TVS deka muka mayuh agi pintu ngagai Sarawak dikelala ba menua bukai lalu nambahka penatai pemisi menua kitai nengah sektor dagang temuai,” ku iya.

Sama bisi datai malam nya Speaker Dun Amar Mohd Asfia Awang Nassar, Sapit Kepala Menteri Datuk Amar Douglas Uggah Embas, Datuk Amar Awang Tengah Ali Hasan enggau Tan Sri Datuk Amar James Jemut Masing,

Sekretari Perintah Sarawak Datuk Amar Jaul Samion, Chairperson Sarawak Media Group (SMG) Datuk Norhayati Mohd Ismail enggau ke bukai.