KUCHING: Penumbuh TV Sarawak (TVS) manah ungkup pengerembai menua Sarawak kelimpah ulih ngenegapka jaku Iban di menua tu, ku Pengajar Mabong Unggang.

Iya ke mega Ketuai Akademik Gerempung Dayak Iban Sarawak (Asadia) madah diri berasai temegah laban nengah TVS tu mayuh lansa kenang ari menua Sarawak deka ulih dikerembai kelimpah berasai temegah laban TVS bisi bekenaka jaku Iban.

“Aku pechaya mayuh bala nembiak ulih ninga jaku Iban nengah TVS tu lalu nengah nya mega deka ulih ngangkatka jaku Iban kitai.

“Program ti ngemeranka pekara di menua Sarawak mega siti pengawa ti manah baka main asal enggau mandangka pupu raban bansa di Sarawak,”ku iya madah ngagai Suara Sarawak bekaul TVS ke udah ayan ba Astro.

Nangkan nya, Mabong mega melaba semua raban bansa di Sarawak mega berasai temegah sereta gaga ati meda pemendar enggau pemanah diatur Perintah Sarawak ti numbuhka TVS.

Kenu ku iya, bansa kitai tauka orang Sarawak ti diau di Semenanjung enggau menua bukai mega tentu berasai teperindang sereta gaga ati meda TVS tu.

“Taja pia, arapka ba maya ti deka datai ba tikas pengelandik pematak randau jaku Iban ulih ditegap sereta dikemanah agi.

“Aku ngarapka jaku Iban mega enda bechampur enggau jaku ari bansa bukai,” ku lalau iya.