KUCHING: Nadai atur bukai dipejalai ba adan menua naka diatu kelimpah nutup adan menua Kalimantan enggau Sabah beduduk ari kes Covid-19 ke majak nambah, pia ku Sapit Kepala Menteri Tan Sri James Jemut Masing.

Ku iya, naka diatu adan menua Sarawak agi dipatau baka selama.

“Taja pia, kitai mesti nutup adan menua ungkup nyaga pengelikun rayat Sarawak,” ku Masing.

Masing mansutka jaku nya ba aum pemberita pengudah bejadika Bengkel Pengatur Projek Perintah Sarawak ba sebuah hotel tebilang, ditu tadi.

Iya mega madahka diri lantang ati laban Komiti Penyangga Penusah Ngenyit Nengeri (JPBN) Sarawak setuju enggau perambu sida nutup adan menua.