SIBU: Juluk siku lelaki deka ngeluarka duit Wang Turu Pengereja (KWSP) enda tejapai pengudah iya dipelaba lemas labuh ari bot ekspres ba Palan Penyangkai Ekspres Daro, Jalai Khoo Peng Loong, Hari Satu tu tadi.

Ketuai Polis Pelilih Sibu ACP Stanley Jonathan Ringgit madah, penusah tu nyadi lebuh bot ekspres nyau deka sangkai ba jelatung nya urung pukul 8 pagi Hari Satu tu tadi.

Stanley mega ngenukuka entua iya ke lelaki benama Sta Dana, 51 taun udah ngaga ripot polis ba Balai Polis Sentral pengudah nerima berita tu.

“Lelaki dipelaba lemas nya benama Neckson Entinggi Isek beumur 39 taun ari Daro.

“Sebedau penusah tu nyadi, tudah Neckson enggau entua iya ba rantau jalai ari Daro ngagai Daro laban deka ngeluarka duit KWSP iya.

“Lebuh nyau deka sangkai ba jelatung nya, enda mukai-mukai tudah ti duduk ba belakang bot ekspres labuh ke sungai.

“Entua iya nguji narit jari Neckson tang tudah ditaban arus deras sungai lalu tenggelam,” terang iya.

Nitihka penerang, sida sebilik madahka tudah Neckson diserang penyakit sawan lebuh iya labuh ke sungai nya.

Naka berita tu ditulis, operasyen SAR benung chakah dipejalai.