KUALA LUMPUR: Perintah deka nyain Sempekat Pemereti Ati (MoU) enggau China nentuka Malaysia nyadi entara menua keterubah nerima vaksin Covid-19 ari menua nya enggau disadang abis laun ujung taun tu.

Menteri Besai Tan Sri Muhyiddin Yassin madah, randau begulai Menteri Luar Datuk Seri Hishammuddin Tun Hussein enggau bakih sama pangku pengawa ari menua nya, China setuju ngerintaika Malaysia entara penerima keterubah vaksin pengudah tembu pansik klinikal vaksin nya.

“Aku berasai gaga ninga berita tu lalu aku udah minta kerejasama ti diaku nengah MoU ti deka dipejalai enggau China,” ku iya ba aum pemberita khas ba rumah iya di Putrajaya, ditu kemari.

Nambahka nya, Muhyiddin madahka perintah setuju nyereta Covid-19 Vaccine Global Access (COVAX), sebuah gerempung entarabans ati ngembuan perengkaguna mantu menua maju ngulihka vaksin Covid-19 enggau vaksin ungkup penyakit bukai.

Muhyiddin madah, taja kerejasama nya begunaka besai belanja tang nya enda nyadi penekul ngagai perintah ngulihka bekal ari pemekal vaksin ari menua bukai.