SERIAN: Pengajar ti ngajar subjek Matematik, Sains enggau Jaku English deka dilatih baru ngambi nambahka penemu enggau pengelandik sida ba subjek nya.

Menteri Pelajar, Sains enggau Pansik Teknologi, Datuk Amar Michael Manyin Jawong madah, opis menteri iya udah diberi agih belanja ngambi meri latih baru ngagai pengajar tu.

Ku iya, sekeda pengajar diasuh ngajar subjek nya taja ukai pelajar diambi tauka dipilih sida.

“Kitai enda nyalahka sida laban sida dianjung ngagai sekula ti mit lalu nadai pilih bukai enggau Kepala Pengajar mega ngasuh sida ngajar subjek nya.

“Nya mih siti pemar ditapi Opis Pelajar Nengeri Sarawak (JPNS) lalu kitai udah berandauka pekara tu enggau Kepala Menteri ke alai iya udah ngenedar agih belanja kena matih baru bala pengajar tu,” ku iya.

Manyin mansutka jaku nya ba Pengerami Kolokium Pelajar 2020 diatur Opis Pelajar Pelilih Serian ba sebuah hotel, ditu tadi.