KUCHING: Sarawak seharitu ngerikod tiga kes positif Covid-19 lalu semua nya bisi sejarah pulai ari Sabah.

Chairman Komiti Penyangga Penusah Ngenyit Nengeri (JPBN)Datuk Amar Douglas Uggah Embas madah, tiga kes nya disidi ba Kuching, Miri enggau Limbang.

“Tu ngujungka semua kes positif Covid-19 ba Sarawak nambah ngagai 755 kes.

“Taja pia, bisi dua kluster ti agi ngerekai iya nya Bah Arnab ngaul empat kes enggau Kluster Putra ngaul enam kes,” ku iya ba aum pemberita Covid-19, ditu tadi.

Uggah ti mega Sapit Kepala Menteri madah, bisi siti kes baru udah suman enggau dikemendar pansut ari sepital ngujungka kes suman naka seharitu ngerikod 691 iku tauka 91.52 peratus.

“Empat PUI baru enggau dua PUI agi nganti pemutus makmal mega dirikod seharitu,” terang iya.

Nambahka nya ku iya, Pelilih Kuching, Sibu, Bintulu enggau Lubok Antu mengkang ba status kuning ngerikod 12 kes berampit dalam menua ba timpuh 14 hari ke udah.

“Tu ngujungka bisi empat pelilih ba status kuning enggau 36 buah pelilih bukai mengkang ba status gadung.

“Bisi 52 kes positif Covid-19 dirikodka kena 26 September nyentuk 14 Oktober di Sarawak ngaul 47 iku peranak menua enggau lima iku peranak luar,” terang Uggah.

Uggah madah bisi 24 kes bisi sejarah pulai ari Sabah.

“Pekara tu setipak enggau gerah JPBN ti ngasuh semua sida datai ari sabah diambi lendir liur enggau dikuarantin pengelama 14 hari ba palan kuarantin.

“Asil ari peresa rT-PCR, bisi 10 kes ditemu positif lebuh beperesa keterubah seraya 14 kes ditemu positif lebuh beperesa kedua kali (hari ke-10) ba timpuh kuarantin,” ku Uggah nerang silik.

Ku iya, bisi enam kes bisi sejarah pulai ari Semenanjung Malaysia ke alai lima kes pulai ari Kuala Lumpur enggau siku pulai ari Perak.