KUCHING: Inovasyen teknologi dron udah ngubah dunya enggau pengidup mensia kelebih agi ari sukut servis nyaga pengerai mensia mayuh.

Ketuai Pemesai Eksekutif Kuching Skills College, Novert Sullang pechaya, teknologi dron ulih mutarka mayuh macham penanggul ditapi sektor nyaga pengerai.

Ku iya, kes pemati ketegal dirampit igi penyakit baka denggi ulih dikurang tauka dipunas jemah lalu penanggul bekaul diputar jampat agi ari asil pengawa matau enggau pansik ti meruan agi.

“Nya kebuah kolej kami nadai beleman lebuh nerima peminta Opis Menteri Pengerai Malaysia (KKM) ngatur kus bekenaka teknologi baru tu ngagai bala staf sida.

“Kami sedarka pengelemi sistem nyaga pengerai tu kebendar ulih diputar lalu pengelikun mensia mayuh dijaga ngena sistem logistik maju di langit,” ku iya.

Novert mansutka jaku nya lebuh dirandau Suara Sarawak ba pengawa nyuaka setipikit tembu Kus Pengelandik Nerebaika Dron ngagai empat staf Opis Pengerai Nengeri Sarawak (JPNS) betuaika Dr. Azlee Ayub di baruh inisiatif KKM, kemari.

Berita penuh ba R8 pagila

LATIH PRAKTIKAL… Bala penyereta diterang pasal kereban dron.

 

PENELEBA BARU… Dr. Azlee Ayub nguji nerebaika dron diembing pengajar KSC empu.

 

TERIMA KASIH… Novert nyuaka setipikit tembu kus ngagai Dr Azlee Ayub.

 

KENANG BELAJAR… Dr. Azlee Ayub (tiga kanan) enggau tiga bakih ke bukai begambar ungkup kenang begulai enggau Novert (kiba).