PAKAN: “Puji Tuhan, laban Petara udah ninga sampi aku ti balat suntuk lalu begunaka anak belanja dikena bala anak aku nampung pelajar sida,”ku Jacob Balang,53.

Peranak rumah Rangsa, Ai Ngua, Rantau Abau, Meluan Julau tu meri besai terima kasih nuju mensia mayuh enggau Gerempung Pemansang Raban Nembiak Rebak Baru Pakan/Julau (PNRB) ti nyaup begumpulka pupu belanja dikena mantu iya.

“Sebedau tu, aku kala berandau enggau Chairman PNRB nusui penyuntuk diri ti begunaka belanja dikena tiga iku anak aku ti sama bulih nampung pelajar ngagai Palan Pelajar Tinggi (IPT).

“Dua iku anak aku iya nya Eugene Raphael Ghani Jacob,22 enggau Eunice Endang Jacob,20 bela bulih nampung pelajar ba Universiti Pertanian Malaysia (UPM) lalu siku agi iya nya Eunetty Faye Imba Jacob,19 bulih ba Universiti Kebangsaan Malaysia (UKM).

“Terima kasih mega nuju Jimmy Manju,Sylvia Thomas Salang sereta ke bukai ketegal pengiruh sida ti udah masau hari limpang ngatur pengawa sebedau tu.

“Semina Petara aja ulih malas pemanah enggau pengiruh kita sebuat,” ku iya.

Berebak enggau nya,Chairman PNRB Tedong Chakaw @ Jamal Abdullah madah arapka pengawa PNRB tu tau nyadika chuan sereta teladan ngagai gerempung bukai mantu anak Iban ke mujur ba pelajar sida.

“Juluk kami iya nya deka meda nembiak bansa kitai teulihka pemujur ba pelajar sekula.

“Nya alai,anang sanggu ngelawa PNRB nyema bisi penanggul,”ku iya.

Bantu nya udah disuaka pengari PNRB Sylvia Thomas Salang kena 02 Oktober tu tadi.