KUALA LUMPUR: Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ngelalau semua rayat kelebih agi kaban politik patut berundingka pekara ke nyadi ngambi menua enda napi penusah ketegal gaya politik ke enda menuku.

Ku Datuk Pengelola Bijaya Diraja Astana Negara Datuk Ahmad Fadil Shamsuddin, Agong meri jaku lalu nya laban menua agi napi mayuh penanggul ketegal pandemik Covid-19.

Agong mega ngelalau Kaban Parlimen (MP) mesti tuai runding ba pekara politik enggau mereti sereta mendingka sebana rayat kelimpah anang enda ibuhka pengelantang rayat baka ti udah dipadah rambau Aum Parlimen Ke-14 Penggal Ketiga ba bulan Mei tu tadi.

Ahmad Fadil ba sebengkah penerang dikeluarka Astana Negara kemari madah, Agong sekali agi ngelalau kaban politik anang ngasuh penemu ti bebida ngujungka sida bemunsuh enggau pangan diri.

Tang ku iya, sida mesti mutarka penanggul nengah randau enggau nitihka atur undang-undang dipasuk dalam Konstitusyen Perintah Besai.

“Agong ngelalau semua rayat besampika menua kitai tu diberi pengelantang enggau pengelikun nentuka menua kitai dijamin likun,” terang iya.

Nangkan nya, Ahmad Fadil mega minta semua mesejit ba menua tu besampi ngambi ulih munas pengerekai Covid-19.

Agong madah munyi nya berindik ari Atur Tagang Pejalai Besyarat (PKPB) diterit baru ba Sabah, Selangor, Kuala Lumpur sereta Putrajaya kelimpah bisi kluster baru di Kedah, Perak, Negeri Sembilan enggau Labuan.

“Nya kebuah, Agong madahka semua rayat bempu tanggungpengawa enggau mesti ngembuan disiplin nitihka Atur Pengawa Standard (SOP) ngambi mantu piak bekaul nagang pengerekai Covid-19 ungkup pengelikun diri enggau pengelantang menua,” ku iya.-BERNAMA.