KUCHING: Penemu politik Presiden Parti Keadilan Rakyat (PKR) Datuk Seri Anwar Ibrahim enda ulih diterima maya tu laban menua benung bekenanas nagang pengerekai igi penyakit Covid-19, pia ku Presiden Parti Rayat Sarawak (PRS) Tan Sri Datuk Amar Dr James Jemut Masing.

Masing ti mega Sapit Kepala Menteri nyemetak madah, Anwar enda patut ngereja pekara ke baka enda tuai runding laban iya ngembuan penuduk enggau peneleba dalam perintah.

“Kitai diatu fokus bakani deka nagang pengerekai Covid-19 lalu ukai ngerunding sapa ti deka nyadi Menteri Besai,” ku iya nyemetak madah.

Masing mansutka jaku nya ba aum pemberita di Begunan Baitul Makmur, ditu ensanus.

Masing mega madahka Yang di-Pertuan Agong apin telefon ngagai Gempung Parti Sarawak (GPS) pasal Agong betemu enggau Anwar kena Hari Dua tu tadi.

Ku Masing, sebedau tu Astana Negara kala telefon ngagai GPS pasal pengawa nyiri Tan Sri Muhyiddin Yassin nyadi Menteri Besai.

“Naka tu, Agong apin telefon ngagai kami,” ku Masing.

Ngelansa pasal Anwar ti ingin nyadi Menteri Besai, Masing madahka Anwar patut mantaika pengingin ati nyadi Menteri Besai lebuh ex-Menteri Besai, Tun Dr Mahathir Mohamad nyurutka diri.

“Suba pangku pengawa nya puang lalu Anwar ulih madahka diri bisi majoriti penuduk Parlimen.

“Tang nama kebuah iya enda ngereja pekara nya taja nya mih maya ti betul iya deka nyadi Menteri Besai,” ku tanya Masing.

Nambahka nya ku iya, Perintah Pakatan Harapan (PH) suba udah diberi mandat megai menua tang sida empu udah ngachau nya enggau Dr Mahathir empu ngujungka perintah HP tumbang.