KUCHING: Asil pansik tauka ‘mapping’ digaga Palan Penyangkai Komuniti Mutarka Isu Dadah enggau Pemantu Menua (OSC MIDS) ba taun 2018-2019 mandangka selampur nengeri di Sarawak bisi kaul penyalah guna dadah sepanjai dua taun nya.

Menteri Pengintu Pengelantang Raban Bansa, Orang Indu, Ruang Bilik enggau Pemansang Anak Mit (KWKPK), Datuk Sri Fatimah Abdullah madah, pansik nya digempuru nengah data enggau ngenukuka ‘quantum’ kes aktiviti begunaka dadah nitihka ripot ari piak penerit adat.

“Penerang kes diambi ari Polis DiRaja Malaysia (PDRM), Ejensi Nagang Pengawa Gian Dadah (AADK), Opis Kastam, Opis Pengerai, Opis Pelajar, OSC MIDS Pelilih, Ketuai Komuniti enggau Ketuai Raban Bansa.

“Nitihka ripot asil pansik, mungkur 15 buah pelilih ti mayuh begunaka dadah, 15 buah nengeri ti jelan pemayuh begunaka dadah enggau semilan pelilih kebukai nadai mayuh ngerikod begunaka dadah di Sarawak,” ku iya.

Fatimah bejaku munyi nya ba aum pemberita bekaul Ripot OSC MIDS ungkup bulan September 2020 di Opis iya di Begunan Baitulmakmur II, ensana.

Nangkan nya iya madah asil pansik bagi taun 2018-2019 nya nyadika malin penerang ti deka dikena merambu pelin ungkup nagang pengawa penyalah guna dadah enggau substance.

Kenu ku iya, malin penerang nya ungkup OSC MIDS Nengeri enggau Pelilih ti nengah Kaunsil Pemansang Sosial di KWKPK ti deka merambu polisi, ngemansang program enggau bejalaika intervensyen ti diaku ulih nagang isu gian dadah di Sarawak bepun taun 2020.

“Nya alai, aku ngelalau semua piak awakka beserakup sereta bekerejasama ngemunaska penyalah guna dadah di Sarawak,” ku iya.

Komuniti mega ulih ngeripot pengawa penyalah guna dadah tu nengah Whatsapp ngagai Hotline Opis Penyidi Penyalah Narkotik (JSJN) ba nombor 012-2087222 enggau Hotline Ejensi Nagang Pengawa Gian Dadah (AADK) ba nombor 019-6262233.