TEBEDU: Ungkup timpuh kenyau Januari taun tu nyentuk kemari, Komiti Nagang Penyalah Makai Suap Malaysia (SPRM) Sarawak mujur ngetam 60 iku orang bekaul penyalah makai suap ke bepenyampau RM2,369,121.60.

Direktor iya Mohd Zaki Hassan madah ari penyampau nya, 30 iku udah didawa ba kort.

“Semua iya bisi 49 keretas pansik dibuka lalu 19 iti dipansik nitihka Seksyen 17(b) (Akta SPRM 2009 ketegal penyalah meri suap ngagai pengereja pengawa perintah, udah nya 12 kes dibaruh Seksyen 17(a) ketegal nerima suap.

“Bisi 11 kes ke bukai dipansik nitihka Seksyen 23 ketegal salah guna kuasa, enam kes dipansik dibaruh Seksyen 18 bekaul peminta bula udah nya siti kes dibaruh Seksyen 16(a)(a) laban minta suap,” ku iya madah ngagai pemberita nyerumba program Adan Kitai, Menua Kitai begulai enggau Ejensi Penerit Adat ba Kompleks Imigresen, Kastam, Kuarantin enggau Pengelikun (ICQS) ditu, kemari.

Bela bisi datai Direktor Imigresen Sarawak Datuk Ken Leben enggau Direktor Kastam Sarawak Herman Shah Abdullah.

Mohd Zaki madah bepelasarka statistik nya, penyalah meri suap ngagai pengereja pengawa perintah ngerikod penyampau pemadu mayuh, tu mandangka bisi ripot pasal pengereja pengawa perintah nerima suap ari orang bukai.-Bernama