SRI AMAN: Serakup Pengajar Sarawak (STU) minta mensia mayuh enggau apai indai enda ibuh betalatka pengawa pengajar pengudah abis jam ngajar enggau luar sekula.

Mandal Presiden STU, Kullin Dayang madah, pekara baka nya enda ibuh dipetalat kelebih agi ba pengawa ngatur nembiak pengudah abis jam sekula.

Kebuah pia ku iya, udah nyadi pangku pengawa apai indai ngemata ulah bala anak enti ba luar sekula.

“Mensia mayuh kelebih agi apai indai patut nemu tatak jam pengajar gawa enggau sedarka tanggungpengawa diri empu.

“Bepanggai ba penyiru pengajar nya empu enti deka kiruh nyaga enggau ngelara ulah anak sida udah jam abis sekula,” ku iya.

Kullin mansutka jaku nya ba pengawa bejadika Aum Besai Ninting Taun (AGM) STU Ke-17 Bagi Menua Sri Aman ba sebuah hotel tebilang ditu, apin lama ke udah.