SELANGAU: Penembu projek ‘Selangau Waterfront’ deka ngubah landskap pemanah pasar Selangau enda lama agi.

Kaban Kunsil Nengeri (Adun) Tamin Ir Christopher Gira Sambang madah, ubah pemansang nya endang udah lama dianti rayat dia kenyau ari suba.

“Rayat di Selangau udah lama nganti projek tu dipenyadi.

Projek tu deka mantaika pemanah tebing Sungai Batang Mukah ti mega nyadi siti ari palan merindang ati tungga menua kitu,” pia ku iya madah nengah Facebook iya, kemari.

Naka ke diatu ku iya, projek nya benung dipejalaika lalu dipelabaka benung ba tikas 30 peratus udah ditembuka.

PROJEK PERINTAH SARAWAK…Projek tu dipelabaka tembu tengan taun 2021.

“Pengawa nembuka projek bisi tejanggal ketegal pengerekai COVID-19.

“Taja pia, projek tu diatu udah ulih diteruska lalu disadang tembu tengah taun 2021,” ku iya madah baru.

Berebak enggau nya, Gira meri besai terima kasih ngagai pegai Perintah Sarawak ti udah ngamatka semaya ngaga ‘Selangau Waterfront’ nya.

Tu tau bendar nyadi siti ‘kelai’ ngagai pasar Selangau jemah ila ti mega siti ari palan alai mensia mayuh ngetu lebih agi maya ba pejalai ari Sibu ke Bintulu.

“Aku ngarapka mensia mayuh menua tu empu meri kerjasama ngagai ejensi ti ngaga projek sereta bala kontraktor ngambika projek tu enda tejanggal lalu tembu nitihka timpuh,” ku iya.