KUCHING: Projek rentayan jalai alun ba sepanjai adan menua Sarawak-Kalimantan mesti ditanggung perintah besai laban nya ukai semina adan menua Sarawak tang adan menua Malaysia, pia ku Sapit Kepala Menteri Tan Sri James Jemut Masing.

Ku iya, projek nya dipelaba beungkus RM24 bilion diperambu di baruh Langgur Pemansang Malaysia Lumpar Ke-12 (RMK12).

“Perintah Sarawak setuju bejalaika projek nya tang diatu sapa ti deka mayar ungkus nya.

“Jalai alun ba adan menua nya mungkur ari Sematan ke Lawas sepanjai 1,000 kilometer,” ku iya ba aum pemberita ba opis iya di Begunan Baitulmakmur, ditu ensanus.

Nambahka nya ku Masing, rentayan jalai alun kedua (STR), jalai tebing tasik enggau semilan jematan beungkus RM11 bilion nya inisiatif Perintah Gempung Parti Sarawak (GPS) ungkup rayat.

Iya ti mega Menteri Pemansang Infrastruktur enggau Palan Penyangkai Kapal madah, bisi 11 pakej STR nyengkaum jematan.

Tan Sri James Jemut Masing

“Jalai ungkup STR udah dikelala lalu mesti tembu dalam taun 2025,” ku Masing seraya madahka jalai tebing tasik enggau semilan jematan nya disadang tembu ba taun ti sama.

Berindik ari nya, Masing ningkah penerang Adun Bawang Assan Datuk Seri Wong Soon Koh ti enda setujuka perambu STR ke alai sebedau tu iya nadai bejaku maya projek nya dibantai ba Kabinet.

“Soon Koh bisi enggau kami dalam Kabinet lebuh berandauka pekara tu.

“Iya nadai bejaku enggau mantah, tu bereti iya setuju tang diatu iya enda setujuka projek nya dipejalai,” ku Masing nyemetak madah.

Ku iya, projek ngaga semilan jematan nya lanchar dipejalai nitihka perambu tang laun tembu ketegal pandemik Covid-19 tu.

Taja pia, iya madahka projek nya deka tembu baka selama.

Terang iya, projek jalai nya deka meri pemaik ngagai 60 nyentuk 70 peratus peranak menua tu.

“Kelimpah ari nya, projek tu ngemandakka timpuh pejalai enggau ungkus dikena kitai,” terang iya.