SARATOK: Tujuh buah rumah panjai ditu udah nerima bantu kereban berumah nengah Projek Mesra Rakyat (PMR) kandang seminggu nyin tadi.

Sapit Menteri Pengeluar Kuasa enggau Pengeraja Asal ti mega Kaban Parlimen Saratok, Ali Biju madah, projek nyeleti enggau ngaga baru rumah panjai ulih dirumban nengah agih belanja di baruh projek nya.

Ku iya, kitai meda tebal agi peranak rumah panjai mupuk begagaka rumah ketegal bisi penekul ba belanja kelimpah penanggul bukai.

“Nya kebuah aku ngena inisiatif PMR tu nyaup sida nyendiaka ramu dikena berumah baka atap, tile, batu bata enggau ke bukai.

“Taja dipeda baka enda mayuh tang kami lantang ati lebuh tepedaka penampak mua sida ke nerima bantu tu laban kitai meretika utai diasaika sida lebuh berumah,” ku iya lebuh dirandau Suara Sarawak.

Ali madah, pengawa nganjung kereban berumah nengah projek PMR tu deka dipejalai berenggat laban agi tubah rintai rumah panjai nerima bantu tu.

“Aku ngarapka kita sabar ati nganti gintir diri empu laban pengawa enda ulih dipejalai berebak.

“Ari nya aku minta kita ke apin nganjung peminta patut tau ngelawa opis palan servis komuniti din, tu mih peluang kita ngulihka pemansang,” terang iya.

Berita penuh ba Ruai 8 pagila

BANTU DATAI… Lori nganjung atap spandex datai ba tengah laman Rumah Anchang, Sungai Muding, Sebetan, kena 12 Oktober tu tadi.

TERIMA KASIH YB… Peranak Rumah Pantan, Ulu Senulau lantang ati nerima bantu tile kena 13 Oktober tu tadi.