Timbal ari mensia mayuh sentang dua bengkah program ba TVS ke endang tuchi ngena jaku Iban iya nya Iban Global enggau Sada Kenyalang chukup manah.

Dua program tu chukup ngemegah bansa kitai Iban laban ari program ke baka tu jaku kitai bansa deka terus ngerembai ulih didinga ba dedini menua. Pemanah program tu berupai ngangkatka bansa kitai Iban ngambika ulih dikelala orang luar kelebih agi ba sukut pengelandik enggau pengelebih kitai tu bisi penyulut ke sebaka tikas enggau bansa bukai.

Ba program keterubah Sada Kenyalang TVS bisi ngerandau siku penanyi Iban ke tebilang sereta dikerinduka bala peminat industri lagu Iban iya nya Eyqa Saiful endur iya bisi bekunsi pasal penatai diri, pejalai pengawa merindang, pemujur, pemar enggau bemacham pekara bukai ke bekaul.

Udah nya ba program ke dikumbai Iban Global, piak TVS nyerungkai pemujur sesiku orang enggau lebih lenak awakka pejalai pemujur ke dijapai iya nyadika peransang lebih agi ngagai komuniti kitai Iban. Ba program keterubah Iban Global tu tadi, piak TVS udah nganggauka Kulleh Grasi.

Berita pengerembai TVS ke udah ulih dipeda ba Astro channel 122 tentu udah ditemu semua anak Sarawak di selampur nengeri tu. Taja pia ari urung 2.8 juta iku rayat Sarawak engka ukai semua ruang bilik bisi ngembuan Astro. Nya alai, Perintah Sarawak nyemetak madah diatu ungkup timpuh setaun agi dalam timpuh nguji numpang ba siti pelasar ti bebayar lalu besemaya ngayanka TVS ba stesyen TV pechuma (MyTV) dalam taun baru (2021).

Program Sada Kenyalang ke dikemujur Pematak Randau TVS Steward Dawi, pukul 12.30 ngalih hari ninting Hari Enam.

Semaya tu dibantaika Kepala Menteri Datuk Patinggi Abang Johari Tun Openg empu rambau Pengerami Makai Lemai Bejadika TVS di Palan Aum Borneo Kuching (BCCK) kena 10 Oktober tu tadi.

Nyadi juluk rayat Sarawak deka bisi stesyen televisyen kediri diatu udah nyata taja udah lama nganti sekumbang 57 taun begulai sebilik enggau nengeri bukai dalam Malaysia. Tu entara pemujur besai perintah nengeri tu lalu tau dikumbai pengelebih laban nyadi nengeri keterubah bisi stesyen TV kediri.

Diatu tepulai ngagai pengelandik anak Sarawak ngaga chura mandangka kreativiti diri dalam TVS awakka penau, pengelandik, pemanah, pengaya main asal asal, penyelai adat pupu bansa ke bisi di Sarawak ulih dikelala enggau ditemu orang bukai ba serata dunya.

Siti pengelebih ke TVS tu mega ngembuan mayuh macham program ke mungkur semua pekara baik nya ari sukut pengerai, ekonomi, rama, main asal, lumba, pemerindang, penemu, berita enggau ke bukai.

Tambah mega, program ke bisi dalam TVS ditusun enggau chukup silik mungkur jaku ke endang ditemu rayat di nengeri tu empu enggau menua luar baka jaku Iban, Melayu, China enggau English. Nyadi tusun program TVS ke mungkur empat jaku besai ke suah didinga di nengeri tu nyadi pakej ti bisi penyelai enggau pengelebih nadai dikembuan stesyen TV bukai.

Asil ari perati dalam kandang beberapa hari udah beoperasyen dia penulis meda TVS endang bisi jalai ngerembai jauh tauka angkat mansang laban pemanah rampa menua enggau pengaya adat di menua tu endang jarang dibantai silik ba stesyen TV bukai ngelama tu.

Rayat lebih agi di menua pesisir tentu nginginka pendiau pengidup penusah pengurang ke diasai sida dibantai ba media ke besai baka TVS awakka pekara nya ulih diputar perintah nengah ejensi tauka piak bekaul. Ambika chunto dini menua ke empai bisi bekal ai beresi, karan, jalai alun ke menyana. Nyadi semua tu ulih dibantai nengah program ke endang udah disediaka piak TVS.

Nyadi semua entara batang pekara ke dikeandal rayat lebih agi komuniti ke diau ba menua pesisir. Sida tentu gagit deka meda isu-isu ke nekul sida ukai semina ulih dibantai nengah ripot berita tang terus nerima timbal tauka diputar piak ke bekaul.

Kitai bela ngandal mega, TVS ulih mai siti ubah ke baru ba pemujur pengidup komuniti kitai awakka identiti, bansa, jaku enggau adat bansa kitai terus pegari sereta meruan dijaga ngambi terus ditampung nembiak rebak baru.