KUCHING: Bisi empat kes positif Covid-19 nambah baru ari Kluster Bah Arnab di Pelilih Kuching iya nya sida ke bisi kaul semak enggau kes kluster nya, sehari tu.

Nitihka penerang Komiti Penyangga Penusah Ngenyit Nengeri Sarawak (JPBNS) penyampau kes positif Covid-19 diatu nambah ngagai 763 kes ti ngaul empat kes ari Kluster Bah Arnab.

“Semua kes bela ari Pelilih Kuching ti bisi kaul semak enggau kes ke-719 ti positif Covid-19 pengudah diperesa dua kali iya nya ba hari ke-10.

“Kes ke-719 tu siku peranak menua tu empu ti bisi sejarah bejalai ngagai palan ti bisi kes positif Covid-19 ti tinggi (Sabah) sebedau diperesa enggau dikenuku Positif Covid-19 kena 6 Oktober,” Ku penerang nya.

Semua kes mega dipelaba udah kena rampit entara 2 nyentuk 6 Oktober lebuh kes ke-719 bejalaika kuarantin di rumah. Keempat kes nya mega diperesa rT-PCR keterubah kena 6 Oktober tang pemutus peresa negatif Covid-19 kena 8 Oktober.

“Kes keempat mega diperesa baru kedua kali kena 16 Oktober ti ngujungka pemutus peresa rT-PCR dikenuku positif Covid-19 kemari.

“Semua kes nadai mandangka kelai kena rampit penyakit Covid-19 enggau sida lalu dipasuk ngagai Sepital Besai Sarawak,” ku tandu penerang nya.

Pia mega ungkup Kluster Putra di Pelilih Bintulu agi mengkang enam kes.

Berebak enggau nya, bisi empat kes baru udah suman enggau dikemendar pansut ari sepital. Semua kes udah suman enggau dikemendar pansut ari sepital nya bela ari Sepital Besai Sarawak.

Tu ngujungka kes positif Covid-19 udah suman enggau dikemendar pansut ari sepital nambah 700 iku tauka 91.74 peratus ari penyampau kes Covid-19 di Sarawak.