KUCHING: Komiti Pengatur Kaul Entara Parti Komponen Gempung Parti Sarawak (GPS) ditumbuh dikena nyikap parti nya napi Pengawa Bepilih Besai Nengeri (PRN) ti deka datai.

Chairman Komiti ti mega Kaban Supreme Kaunsil Parti Pesaka Bumiputera Bersatu (PBB) Datuk Sri Wan Junaidi Tuanku Jaafar madahka pekara nya kala digaga sida maya agi nyemilik Barisan Nasional (BN) suba.

“Tang serak tu, isu ti dikerandau raban dalam komiti lebih dalam agi sentang kaul parti komponen dalam GPS.

“Enti suba isu pasal pekayan, lambang, baju enggau ke bukai dipeda pia aja tang dalam GPS pekara tu deka dikerendau lebih nyemetak,” ku iya.

Wan Junaidi bejaku munyi ba aum pemberita di Jalai Kulas ditu, kemari.

Tandu iya, pekara nya nyemetak agi patut dikerandau laban pengawa bepilih nyau udah deka semak.

“Nya kebuah komiti tu mesti disikap tegap kelebih agi PRN nyangka deka diatur seberang maya.

“Aku enda ulih madah kemaya PRN deka diatur tang timpuh Dun penggal ti ke-11 tu deka badu ba pengujung bulan Jun taun baru.

“Kami mesti ngadang laban pemutus PRN diletak Kepala Menteri pengudah iya berandau enggau ketuai parti komponen bukai lalu minta pemendar ari Tuai Pemegai Menua (TYT) madamka Dun,” ku iya.

Kenu ku iya, nya endang undang-undang lalu ukai politik laban enti enda dipadam, Dun deka padam kediri ujung bulan Jun taun baru.

“Udah Dun dipadam baru Komiti Pengawa Bepilih Besai (SPR) ngatur dini endur bejalaika PRN, kemaya nganjung nama chalun, maya muai undi enggau ke bukai kelimpah nentuka Atur Pengawa Standard (SOP) ti patut dititihka maya ngundi.

“Diatu kami melaba PRN nyangka deka diatur pengabis laun ujung bulan Jun taun baru.

“Entara isu ti dikerandau dalam komiti tu iya nya bekaul enggau sitak ti nadai bisi ngembuan pengari ari GPS.

“Ari komiti tu kami deka merambu nama pekara ti patut digaga ngambika kaul GPS enggau rayat ba palan nya ulih dikemanah,” ku iya.