KUCHING: Kaban politik ba selampur menua nadai ngira penyakal tauka perintah dipinta ngemeratka pengelantang rayat enggau ngiarka agenda diri ketegal deka nguntungka diri.

Presiden Parti Demokratik Progresif (PDP) Datuk Seri Tiong King Sing madah, kaban politik enda tau enda beratka pengelantang rayat ukai ngerunding diri empu aja.

Ku iya, Presiden Parti Keadilan Rakyat (PKR) Datuk Seri Anwar Ibrahim ti betemu enggau Yang di-Pertuan Agong kena 14 Oktober tu tadi sekali agi udah ngeruga pengelikun Malaysia enggau kebuah ti enda patut.

“Mensia mayuh ba serata dunya diatu ngasaika gaya politik Malaysia nya enda patut nyadi laban pekara nya enda kala nyadi ba timpuh 60 taun ke udah.

“Ulah bepolitik tu ngasuh rayat balat irau kelebih agi diatu kitai napi pengerekai Covid-19,” ku Kaban Parlimen Bintulu nya meri penerang.

Duta Khas Menteri Besai ngagai Republik Rakyat China nya nyemetak madah, penyakal enggau perintah diatu bempu pangku pengawa mulaika pemanah ekonomi menua nentuka rayat enda tusah enggau keberuran.

“Bala ketuai mesti berundingka strategi enggau ngandalka rayat sentang ekonomi kitai mengkang tegap taja napi penusah diatu.

“Nya kebuah, semua piak badu agi berebut kuasa ketegal deka nyadi Menteri Besai lalu teju enggau meri sukung ngagai Menteri Besai Tan Sri Muhyiddin Yassin ti udah mantaika penau diri megai menua tu,” terang iya.

Tiong nyemetak madah, Perintah Besai diatu ukai perintah pintu belakang laban Pakatan Harapan (PH) empu ti udah ngelabuhka perintah sida.