SIBU: Profesor Sains Politik, Fakulti Ekologi Manusia enggau Dekan Fakulti Kemanusiaan, Pengurusan dan Sains di Universiti Putra Malaysia (UPM) Profesor Dr Jayum Jawan andal gempung Parti Sarawak (GPS) deka menang ba Pengawa Bepilih Nengeri Ke-12 (PRN12) deka datai.

Ku iya, pekara tu deka mai GPS ngetanka kuasa ngatur perintah ba menua tu.

“Nadai penanggul deka menang enti sema pengawa bepilih diatur sebarang maya berengkah ari diatu.

“GPS datai ari gempung parti ti tegap lalu genap komponen bisi raban ngatur pengawa ba renggat baruh,” ku iya lebuh bejaku ba seminar online diatur Fakulti Ekologi Manusia, UPM malam kemari.

Seminar tauka Webinar nya mantaika batang jurai ‘The Hornbill Dilemma: The Coming Sarawak Election’ mai tiga iku peranak Sarawak ti pegari nama iya nya Profesor Dr James Chin, Jayum enggau Dr Nuurrianti Jalli.

Ku Jayum, taja GPS disadang ulih menang tang nyangka deka lenyau 2/3 penuduk baka dipenggi diatu, reti iya ukai muntang deka menang sekalitu.

“Aku pechaya, GPS bisi ‘chara’ sida empu napi pengawa bepilih serak tu,” ku iya madah nyemetak.

Jayum madah, isu ba mengeri enggau menua pesisir kelebih agi raban bansa Dayak apin ulih disagam.