KUCHING: Ninting hari sida sebilik endang nganti ba mua televisyen laban deka meda anak ke disayau ayam macha berita.

Marzella Sigai beumur 27 taun, siku ari pemacha berita Iban ke berengkah angkat ba stesyen televisyen dipenggi Sarawak ke udah dipenyadi kena 10 Oktober ke udah.

“Kenyau nyereta TVS, kami sebilik sigi betunggang sukung ngagai aku.

“Taja nadai peneleba ba pengawa TV, tang peneleba ari pengawa aku ke nyadi model nyambil enggau duta produk maya agi belajar, meri aku pemerani maya ayan ba mua TV,” ku iya.

Kenu ku indu Iban tu, minat nya datai kediri lalu ngujungka iya nyadi berani gawa nyadi personaliti TV.

MARZELLA SIGAI Foto MOHD ALIF NONI

“Bidang tu mega mantu aku ngangkatka personaliti diri. Aku sigi enda nyekat diri ngerembaika penau ungkup dudi hari,” ku iya.

Tikas pemandai diri, bisi ngembuan Degree Pengatur Pengawa Dagang (Bejual) tu kebendar ngetau peneleba betungga enggau penuntun sereta kamea kenyau ari agi belajar.

“Suba ba Unimas, aku mega bisi belajar chara berandau enggau manah sereta kaul enggau mensia mayuh.

“Nya alai enda mayuh bida enggau diatu. Semia diatu aku patut belajar chara bakani ba mua mensia mayuh.

“Diatu aku enda rawan tauka malu bediri ba mua kamera lalu ngasai lebih berani,” ku iya.
Marzella mega bisi ngemujurka Program Borak Teh C Peng ke dipandang tiga hari ninting Hari Lima nyentuk Hari Minggu, pukul 7.30 pagi di TVS – channel 122 Astro.

Indu Iban ke ngembuan tuchum ke manis dipeda tu ngembuan pengandal ati enggau juluk ke tinggi ungkup batang pengawa nya.

“Aku arapka ulih ngerembaika pengelandik diri ba bidang ngatur randau enggau nyadi pemacha berita ti tebilang.

“Aku mega ngarapka rayat Sarawak terus meri sukung ngagai stesyen TVS tauka televisyen menua kitai tu,” ku iya.

MARZELLA SIGAI Foto MOHD ALIF NONI