BELAGA: Pelilih menua tu deka ngembuan siti laman baka mengeri Kapit lebuh projek tu bulih pemendar ari Kepala Menteri Datuk Patinggi Abang Johari Tun Openg.

Ku Abang Johari, projek beungkus RM20 juta nya sebagi ari pelin besai ti diperambu Perintah Sarawak ungkup pemansang menua Belaga.

“Kitai deka ngemansangka laman tu nyadi kelai baru menua Belaga,” ku iya lebuh bejaku ba Program Nasih Tanah Kaunsil Pelilih Belaga enggau Bejadika Waterfront Belaga ditu, kemari.

Kelimpah ari nya, iya mega merambu deka ngaga jalai alun ngaul Belaga enggau Kapit nyengkaum Bintulu.

“Suba enti deka datai ngagai Belaga ukai muntang laban mesti ngena bot lalu nyema bisi penusah karam, mayuh orang bebadi nyawa.

“Lebuh ngerunding pekara tu, kami deka ngaga jalai alun ari Kapit nuju ke Belaga, taja ungkus pengawa tu besai tang enti ati kitai lurus Tuhan seruran deka mantu,” ku iya.

Berebak enggau nya, Abang Johari madahka pelin besai Belaga mega bisi nyengkaum pemansang genturung di seberai sungai, genturung palan berumah baru enggau genturung palan komersial ti baru.

“Tu entara perambu jeman baru kitai lalu aku pechaya Perintah Sarawak ari suba nyentukka diatu deka terus ngemansangka pelilih menua seriris enggau jeman nyengkaum Belaga awakka enda tinggal ari pemansang,” ku iya.

Sama bisi datai Sapit Kepala Menteri Tan Sri Datuk Amar James Jemut Masing, Menteri Muda Elektrik Menua Pesisir Datuk Liwan Lagang, Menteri Muda Bekal Ai  ti mega Menteri Muda Pekara Islam enggau DBKU Datuk Dr Abdul Rahman Junaidi, Sapit Sekretari Perintah Sarawak Datuk Seri Mohamad Abu Bakar Marzuki, Kaban Parlimen Rajang Datuk Wilson Ugak Kumbong enggau Adun Murum Keneddy Chuk Pai Ugon.

(LANDIK…Abang Johari mandangka pengelandik bemain sape seraya dikemataka Masing (kiba), Liwan (dua kanan) enggau Ugak rambau Pengawa Nasih Tanah projek pemansang ba Pasar Belaga, kemari. -Foto Ghazali Bujang