SARATOK: Sepenyampau RM400,000 udah dikemendar dikena nyeleti blok kelas Sekula Sekondari (SMK) Saratok ti digaga ari kayu sebedau tu.

Sapit Menteri Pengeluar Kuasa enggau Pengeraja Asal, Ali Biju madah, agih belanja khas tu dikemendar nengah projek nyeleti sekula repuk di baruh Pakej Nungkak Ekonomi (PRE) Prihatin Nasional.

Ku iya, projek nyeleti blok kelas udah lama dianti unkup pengelikun enggau pengelantang bala nembiak enggau pengajar dia.

“Enda lebu aku nandu pengawa bepintaka projek nyeleti sekula kitai di Saratok ditu laban beratika bala nembiak enggau pengajar ti berasai enda likun enggau lantang lebuh ngena kelas nya.

“Kitai udah meda asil diatu ke alai mayuh agih belanja diungkup ngagai pemansang sekula ba sitak tu lalu taun baru belanja nya deka ditambah,” ku iya.

ENDA LIKUN… Pendiau dalam kelas ti deka diseleti tau endar ngeruga pengelikun nembiak enggau pengajar.

Ali ke mega Kaban Parlimen Saratok mansutka jaku nya lebuh dipebasa nyerahka jemari (locker) enggau katil ba buding digaga nengah Projek Mesra Rakyat (PMR) di baruh PRE Prihatin ba SMK Saratok ditu, pagi tadi.

Iya madah, piak Opis Menteri Pelajar Malaysia (KPM) betuaika Menteri Pelajar Malaysia, Dr. Mohd Radzi Md Jidin nyau deka ninting hari ninga sebana pasal sekula repuk ba Sarawak ti begunaka perati jampat.

Ba lansa sama, 112 buah jemari enggau 105 buah katil deka ditambah taun baru nentuka genap iku nembiak diau lantang laban bisi jemari enggau katil Kediri.

“Ungkus semua tu dipelaba enda ngelui RM200,000 lalu projek dipejalai nengah chara kitai empu ngaul raban gempung ukai dikuasa perintah (NGO) enggau kunteriktor mit ngambi pengawa nyamai diadu enggau jampat tembu.

“Kitai naka ulih nyikap sekula menua pesisir ti meruan enggau lantang agi ungkup pemansang pelajar enggau nempa modal mensia ti menyana jemah,” simpul iya.